ജീവിതം മുഴുവന്‍ ഒരേ ഭക്ഷണം കഴിക്കേണ്ടി വന്നാല്‍ നിങ്ങള്‍ എങ്ങനെ സഹിക്കും. രുചി തേടി അലയുന്ന ഇന്നത്തെ സമൂഹത്തില്‍ വിശ്വസിക്കാനാകാത്ത അപൂര്‍വ്വ രോഗത്തിനുടമയാണ് ഈ യുവതി. ചോറും പച്ചക്കറിയുമല്ലാതെ എന്ത് കഴിച്ചാലും ഈ യുവതിയ്ക്ക് മരണം ഉറപ്പാണ്. ലണ്ടനിലെ പ്രശസ്ത ഫാഷന്‍ ഡിസൈനറായ സോഫീ വില്യംസ് എന്ന യുവതിയ്ക്കാണ് ഈ ദുരവസ്ഥ. കേട്ടാല്‍ വിശ്വസിക്കാന്‍ കഴിയില്ല. എന്നാല്‍, വര്‍ഷങ്ങളായി ഈ അവസ്ഥയിലൂടെ കടന്നു പോകുകയാണ് സോഫി. മാസ്റ്റ് സെല്‍ ആക്ടിവേഷന്‍ സിന്‍ഡ്രോം എന്നാണ് ഈ രോഗത്തിന്റെ പേര്. ഒരു ലക്ഷം പേരില്‍ ഒരാള്‍ക്ക് ഉണ്ടാവുന്ന ഈ രോഗാവസ്ഥയാണ് ഇപ്പോള്‍ സോഫിയുടെ നിത്യജീവിതത്തെ ബാധിച്ചിരിക്കുന്നത്. സൂര്യപ്രകാശം അടിക്കുന്നത് പോലും സോഫിയുടെ ജീവന്‍ അപകടത്തിലാക്കും. ഇറച്ചിയോ മീനോ മുട്ടയോ പാലുല്‍പന്നങ്ങളോ പ്രിസര്‍വ്വേറ്റീസുകളോ എന്തിന് ഉപ്പ് പോലും സോഫിയുടെ ജീവന്‍ അപകടത്തിലാക്കും. അലര്‍ജി പ്രശ്നങ്ങള്‍ സംഭവിക്കുകയും ചൊറിച്ചിലും അസ്വസ്ഥതകളും ആരംഭിക്കുകയും ചെയ്യും. ദേഹം തടിച്ചു വീര്‍ക്കുക, ചുണ്ടുകള്‍ ചുവന്നു വീര്‍ക്കുക, ദേഹമാസകലം ചൊറിയുക എന്നിവയാണ് രോഗത്തിന്റെ ആദ്യ ലക്ഷണങ്ങള്‍. അറുപതിലധികം മരുന്നുകള്‍ തന്റെ ജീവന്‍ നിലനിര്‍ത്താന്‍ സോഫി കഴിക്കുന്നുണ്ട്. 2014 മുതലാണ് ഈ മാരകരോഗം സോഫിയെ ബാധിച്ചത്. നിരവധി തവണ ബോധം കെട്ട് വീണതോടെയാണ് യുവതി ചികിത്സ തേടുന്നത്. നിരവധി ആശുപത്രികളില്‍ ചികിത്സ തേടിയെങ്കിലും 2016ലാണ് അസുഖം കണ്ടെത്തുന്നത്. 25 വയസ് മാത്രമേ സോഫിക്ക് പ്രായമുള്ളൂ.
Top