വാഷിങ്ടണ്‍: ആരാധകര്‍ക്ക് ആവേശമായി ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ വീണ്ടും ക്രീസിലേക്ക്. സച്ചിനും ഓസീസ് സ്പിന് മാന്ത്രികന്‍ ഷെയ്ന്‍ വോണും ചേര്‍ന്ന് ആരംഭിക്കുന്ന ക്രിക്കറ്റ് ലീഗിന്റെ ഭാഗമായാണ് സച്ചിന്‍ വീണ്ടും ക്രീസിലെത്തുന്നത്.ഓള്‍ സ്റ്റാര്‍ ലീഗ് എന്ന പേരിട്ടിരിക്കുന്ന ലീഗിന് നേതൃത്വം വഹിക്കുന്നത് സച്ചിനും ഓസീസ് സ്പിന് ഇതിഹാസം ഷെയ്ന്‍ വോണുമാണ്. അടുത്തമാസം 11ന് ഹൂസ്റ്റണിലെ മിനിറ്റ് മെയ്ഡ് പാര്‍ക്കിലും 14ന് ലോസാഞ്ചല്‍സിലെ ഡോഡ്ജര്‍ സ്‌റ്റേഡിയത്തിലും തുടര്‍ന്നുള്ള മത്സരങ്ങള്‍ നടക്കും.
ആധുനിക ക്രിക്കറ്റിലെ പ്രമുഖരായ താരങ്ങളെ അണിനിരത്തി ഒരുക്കുന്ന ലീഗ് ട്വന്റി-20 ഫോര്‍മാറ്റിലുള്ളതാണ്. മൂന്നു മല്‍സരങ്ങളാണ് നടക്കുന്നത്. നവംബര്‍ ഏഴിനാണ് അദ്യ മല്‍സരം നടക്കുക. 
രണ്ടാം മല്‍സരം പതിനൊന്നിനും മൂന്നാം മല്‍സരം പതിനാലിനും നടക്കും.അമേരിക്കയിലെ ജനങ്ങളെ ക്രിക്കറ്റിലൂടെ ആനന്ദിപ്പിക്കാനും അവരെ ക്രിക്കറ്റിലേക്ക് തിരിക്കുന്നതിനും വേണ്ടിയാണ് അമേരിക്കയില്‍ ഓള്‍ സ്റ്റാര്‍ ലീഗ് ആരംഭിക്കുന്നതെന്ന് സച്ചിന്‍ വാള്‍ സ്ട്രീറ്റ് ജേണലിനോട് പറഞ്ഞു. ഇതുവഴി അമേരിക്കന്‍ ജനതയെ ക്രിക്കറ്റിലേക്ക് ആകര്‍ഷിക്കാന്‍ കഴിയുമെന്നും ക്രിക്കറ്റ് ഇതിഹാസം പ്രകടിപ്പിച്ചു.
സച്ചിനും വോണും നയിക്കുന്ന ടീമുകള്‍ തമ്മിലുള്ള പോരാട്ടമാകും ലീഗിലുണ്ടാവുക എന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ലീഗില്‍ വാസിം അക്രം, ബ്രയാന്‍ ലാറ, ജാക്ക് കാലിസ്, മഹേള ജയവര്‍ധനെ, മൈക്കല്‍ വോന്‍ തുടങ്ങിയ താരങ്ങളും ഉണ്ടാകും.
Top