ലോകത്തിലെ ഏറ്റവും പൊക്കമുള്ള പ്രതിമ എന്ന് ഖ്യാതി നേടാനൊരുങ്ങുകയാണ് സര്ദാര് വല്ലഭായ് പട്ടേലിന്റെ പ്രതിമ പ്രധാനമന്ത്രി നരേന്ദ്രമോദിയുടെ സ്വപ്നപദ്ധതിയായ ഈ പ്രതിമ 33 മാസത്തെ തുടര്ച്ചയായ ജോലിക്കൊടുവിലാണ് പൂര്ത്തിയായത്. രാം വി. സുത്തര് രൂപകല്പനയും എല് ആന്ഡ് ടി നിര്മാണവും നിര്വഹിച്ച പ്രതിമയുടെ ആകെ ചെലവ് 2989 കോടി രൂപയാണ്.
ചൈനയിലെ 153 മീറ്റര് ഉയരമുള്ള ബുദ്ധപ്രതിമയെയും ബ്രസീലിലെ ക്രിസ്തു പ്രതിമയെയും അമേരിക്കയിലെ സ്വാതന്ത്ര്യപ്രതിമയെയുമൊക്കെ ഉയരത്തില് പിന്തള്ളിയാണ് സര്ദാര് വല്ലഭായ് പട്ടേലിന്റെ ഏകതാപ്രതിമ ചരിത്രത്തിലേക്ക് ഉയരുന്നത്. ഇന്ത്യയുടെ ഉരുക്കു മനുഷ്യന് എന്നറിയപ്പെടുന്ന സര്ദാര് വല്ലഭായ് പട്ടേലിന്റെ 143-ാം ജന്മദിനമായ ഒക്ടോബര് 31 നാണ് പ്രതിമ അനാച്ഛാദനം. സ്റ്റാച്യൂ ഓഫ് യൂണിറ്റി എന്ന് പേരിട്ടിരിക്കുന്ന ഈ പ്രതിമ ഗുജറാത്തിലാണ് സ്ഥാപിക്കുന്നത്..
എന്നാല് പ്രതിമ അനാച്ഛാദനത്തിനെതിരെ അഹമ്മദാബാദിലെ ഗോത്രസമൂഹങ്ങളും കര്ഷകരും വന് പ്രതിഷേധവുമായി രംഗത്തെത്തിയിട്ടുണ്ട്. പ്രതിമ സ്ഥിതി ചെയ്യുന്ന പ്രതിമ സ്ഥിതി ചെയ്യുന്ന നര്മ്മദ ജില്ലയിലെ കെവാദിയ ഗ്രാമത്തിന് സമീപമുള്ള ഗോത്രവര്ഗ്ഗക്കാരാണ് പ്രതിഷേധവുമായി മുന്നോട്ടു വന്നിരിക്കുന്നത്. പ്രതിമ നിര്മ്മിക്കാനും തൊട്ടടുത്ത പ്രദേശങ്ങളിലെ ടൂറിസം വികസനത്തിനുമായി സര്ക്കാര് തങ്ങളുടെ സ്ഥലം കയ്യേറി എന്നാണ് ഗോത്രസമൂഹങ്ങളുടെ ആരോപണം.
ഒക്ടോബര് 31 മരണവീടായി ആചരിക്കാനാണ് ഇവരുടെ തീരുമാനം. ഭക്ഷണം പാകം ചെയ്യാതെ ദുഖം ആചരിച്ച് പ്രതിഷേധിക്കുമെന്ന് ഇവര് വെളിപ്പെടുത്തുന്നു. ഗോത്രസമൂഹത്തിന്റെ സ്ഥലത്ത് പ്രതിമ നിര്മ്മിച്ചതല്ലാതെ ഇവര്ക്ക് പുനരധിവാസ സൗകര്യങ്ങളോ ജോലിയോ സര്ക്കാര് നല്കിയിട്ടില്ല. അതിനെ തുടര്ന്നാണ് പ്രതിഷേധം.