കിളിമാനൂരിൽ മകൻ അച്ഛനെ കൊലപ്പെടുത്തി; കൊലപ്പെടുത്തിയെന്ന് നാട്ടുകാരോട് വിളിച്ചറിയിച്ച ശേഷം പ്രതി മുങ്ങി

തിരുവന്തപുരം: കിളിമാനൂരിൽ മകൻ അച്ഛനെ കൊലപ്പെടുത്തി. കിളിമാനൂർ പനപ്പാംകുന്ന് ഈന്തന്നൂർ കോളനിയിൽ രാജൻ (60) ആണ് കൊല്ലപ്പെട്ടത്. കൊല നടത്തിയ ശേഷം മകൻ രാജേഷ് (28) ഒളിവിൽ പോയി. ബുധനാഴ്ച രാത്രി 10 മണിയോടെയായിരുന്നു സംഭവം.

കഴുത്തിൽ തോർത്തുകൊണ്ട് മുറുക്കിയ നിലയിലാണ് മൃതദേഹം കാണപ്പെട്ടത്. സംഭവം നടക്കുമ്പോൾ അച്ഛനും മകനും മാത്രമായിരുന്നു വീട്ടിലുണ്ടായിരുന്നത്.

മദ്യപിച്ചെത്തി വഴക്കിട്ട രാജേഷ് അച്ഛനെ കൊലപ്പെടുത്തിയ വിവരം അയൽവാസികളോട് വിളിച്ചറിയിച്ച ശേഷം കടന്നു കളയുകയായിരുന്നു.

എന്നാൽ രാജേഷ് മദ്യലഹരിയിലായതിനാൽ അയൽവാസികൾ ഇത് കാര്യമായി എടുത്തില്ല.ഇരുവരും തമ്മിൽ വഴക്ക് പതിവായിരുന്നുവെന്നും അയൽവാസികൾ പറയുന്നു.

അച്ഛനും മകനും തമ്മിൽ വഴക്കിട്ട വിവരം അയൽവാസികൾ രാജന്റെ ഭാര്യയെ വിളിച്ചറിയിച്ചിരുന്നു. ബന്ധുവീട്ടിൽ പോയ  ഇവർ തിരികെയെത്തിയപ്പോഴാണ് രാജൻ മരിച്ചുകിടക്കുന്നത് കാണുന്നത്. തുടർന്ന്  പോലീസിനെ വിവരം അറിയിക്കുകയായിരുന്നു.