തിരുവനന്തപുരം എയര്‍പോര്‍ട്ടിലേക്ക് പോകുകയായിരുന്ന കാര്‍ കെ.എസ്.ആര്‍.ടി.സി ഫാസ് പാസഞ്ചര്‍ ബസില്‍ ഇടിച്ച് രണ്ടു പേര്‍ മരിച്ചു. മൂന്നു പേര്‍ക്ക് പരിക്കേറ്റു. മരിച്ചവരും പരിക്കേറ്റവരും കാര്‍ യാത്രക്കാരാണ്. കാര്‍ ഓടിച്ചിരുന്ന കല്ലൂപ്പാറ മാടത്തുംഭാഗം നോര്‍ത്ത് താനാത്ത് വീട്ടില്‍ സജിമോന്‍ മാത്യു (50), ഇയാളുടെ സഹോദരിയുടെ മകന്‍ ദിബാന്‍ വര്‍ഗീസ് തോമസ് (10) എന്നിവരാണ് മരിച്ചത്. സജിമോന്റെ സഹോദരീ ഭര്‍ത്താവും മരിച്ച പത്തുവയസുള്ള ദിബാന്റെ പിതാവുമായ തോമസ് വര്‍ഗീസ്, ഭാര്യ ഷാലു തോമസ്, മകള്‍ അലീന അന്ന എന്നിവര്‍ക്കാണ് പരിക്കേറ്റത്. ഇവരെ ആശുപത്രിയില്‍ പ്രവേശിപ്പിച്ചു.
തോമസ് വര്‍ഗീസിനെ ഗള്‍ഫിലേക്ക് യാത്രയാക്കാനാണ് കുടുംബം തിരുവനന്തപുരത്തേക്ക് പുറപ്പെട്ടത്.ഇന്ന് രാവിലെ പത്തുമണിയോടെ ചെങ്ങന്നൂര്‍ കാരക്കാട്ടായിരുന്നു അപകടം. ഇടിയുടെ ആഘാതത്തില്‍ അംബാസിഡര്‍ കാര്‍ പൂര്‍ണമായും തകര്‍ന്നു. ബസിന്റെ മുന്‍ഭാഗവും തകര്‍ന്നിട്ടുണ്ട്. ഫയര്‍ഫോഴ്‌സ് എത്തി കാര്‍ വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്.
Top