തമ്പി കണ്ണന്താനത്തിന്റെ സിനിമകളിലൂടെ സൂപ്പര്‍ താരപദവിയിലേക്ക് ചുവട് വച്ച നടനാണ് മോഹന്‍ലാല്‍. അതില്‍ ആദ്യചിത്രമാണ് രാജാവിന്റെ മകന്‍. 1986 ലാണ് ഈ ചിത്രം പുറത്തിറങ്ങുന്നത്. അന്ന് മോഹന്‍ലാലിനെക്കാള്‍ പ്രതിഫലം പറ്റുന്ന നടിയായിരുന്നു അംബിക. ചിത്രത്തില്‍ വിന്‍സന്റ് ഗോമസായി മോഹന്‍ലാല്‍ നിറഞ്ഞാടിയപ്പോള്‍ അഡ്വ. ആന്‍സിയെ അവതരിപ്പിച്ച് കൈയടി നേടിയത് അംബികയാണ്.
തമ്പിച്ചായന്റെ മരണവാര്‍ത്ത വിശ്വാസിക്കാനായില്ല. മരണവാര്‍ത്ത ഞെട്ടലോടെയാണ് കേട്ടത്. എല്ലാവരെയും ഒരുപോലെ കണ്ടിരുന്ന മനുഷ്യസ്‌നേഹിയായിരുന്നു അദ്ദേഹം -അംബിക പ്രതികരിച്ചു.
രാജാവിന്റെ മകനിലെ നാന്‍സിയാവാന്‍ തമ്പിച്ചായന്‍ എന്നെ വിളിക്കുമ്പോള്‍ ഞാന്‍ തമിഴ് സിനിമകളില്‍ തിരക്കിലായിരുന്നു. എന്റെ കഥാപാത്രത്തെ കുറിച്ചൊക്കെ പറഞ്ഞ് നീ വന്ന് അഭിനയിക്കണം എന്നു പറഞ്ഞു. അത്രയും ദിവസത്തെ ഡേറ്റ് കിട്ടില്ല എന്നതായിരുന്നു എന്റെ പ്രശ്‌നം. ഞാന്‍ ആ അസൗകര്യം പറഞ്ഞപ്പോള്‍, ‘നിനക്ക് പറ്റും, നീ വന്നാല്‍ മതി. നിന്റെ സമയം പോലെ നമുക്ക് ഡേ നൈറ്റ് ഷൂട്ട് ചെയ്ത് തീര്‍ക്കാം, അതു നിനക്കു പറ്റില്ലേ?’ എന്നായിരുന്നു അദ്ദേഹത്തിന്റെ ചോദ്യം. അങ്ങനെയാണ് മലയാള സിനിമയില്‍ എല്ലാരും സംസാരിക്കുന്ന ചരിത്ര സിനിമയുടെ ഭാഗമാകാന്‍ എനിക്കു സാധിച്ചത്. എന്നെ തിരക്കുള്ള നായികയാക്കിയതില്‍ അദ്ദേഹത്തിന്റെ പങ്ക് വലുതാണ്- അംബിക പറഞ്ഞു.
‘ആ സിനിമ ഇറങ്ങിയതോടെ ലാല്‍ സൂപ്പര്‍സ്റ്റാറായി. ലാലിന്റെ ലുക്ക്, ഷര്‍ട്ട്, ഡയലോഗുകള്‍, അതില്‍ പറയുന്ന ഫോണ്‍നമ്പര്‍ എന്തിന് എന്റെ സാരികള്‍ വരെ ഹിറ്റായി’ അംബിക പറഞ്ഞു.
Top