തിരുവനന്തപുരം: തന്നെ ഫോണില്‍ വിളിച്ച് അപമര്യാദയായി പെരുമാറിയ ആള്‍ക്കെതിരെ ബാഡായി ബംഗ്ലാവിലെ ആര്യ. ഷോ ഡയറക്ടറെന്ന പേരിലെത്തി ഫോണില്‍ വിളിച്ചു മോശമായിസംസാരിച്ച ശ്യാമിനെതിരെയാണ് ആര്യയുടെ ഗുരുതര ആരോപണങ്ങള്‍. സംഗീത സംവിധായകന്‍ ഷാന്‍ റഹ്മാനും ഇയാള്‍ക്കെതിരെ രംഗത്തെത്തിയിട്ടുണ്ട്.
‘ഹിറ്റ്‌മേക്കര്‍ ദാദു’ എന്നറിയപ്പെടുന്ന ശ്യാം എന്നയാള്‍ക്കെതിരെയാണ് ആര്യയുടെ ആരോപണങ്ങള്‍. ഷോ ഡയറക്ടര്‍ എന്ന് സ്വയം പറഞ്ഞു നടക്കുന്ന ഇയാള്‍ക്ക് ഒരു ഷോ പോലും സ്വന്തമായി സംവിധാനം ചെയ്യാന്‍ അറിയില്ലെന്നും ഒരു ഓസ്‌ട്രേലിയന്‍ ട്രിപ്പിന്റെ ഭാഗമായി തന്നെ ഫോണില്‍ വിളിച്ച് ഇയാള്‍ മോശമായി സംസാരിച്ചുവെന്നും ആര്യ പറഞ്ഞു.
തുടര്‍ന്ന് ഫോണ്‍ കട്ട് ചെയ്യുകയായിരുന്നുവെന്നും ആര്യ പറഞ്ഞു. അന്തസോടെ ജോലി ചെയ്യുന്നവര്‍ക്ക് ഇത്തരക്കാര്‍ ഒരു ഭീഷണിയാണെന്നും അവരെ ഈ ഫീല്‍ഡില്‍ നിന്ന് പുറത്താക്കുകയാണ് ചെയ്യേണ്ടതെന്നും ആര്യ പറഞ്ഞു. മറ്റൊരാള്‍ക്കും പ്രത്യേകിച്ച് തന്റെ സഹപ്രവര്‍ത്തകരില്‍ ആര്‍ക്കും ഇത്തരത്തിലുള്ള അനുഭവങ്ങള്‍ ഭാവിയില്‍ ഉണ്ടാകാതിരിക്കാനാണ് താന്‍ ഈ പോസ്റ്റിടുന്നതെന്നും ആര്യ ഫേസ്ബുക്കില്‍ കുറിച്ചു.
ആര്യയുടെ പോസ്റ്റ് വന്നതിന് പിന്നാലെ സംഗീത സംവിധായകന്‍ ഷാന്‍ റഹ്മാനും ഇതേ ആള്‍ക്കെതിരേ ആരോപണവുമായി ഫേസ്ബുക്കിലൂടെ രംഗത്തെത്തി. ശ്യാം എന്ന ആള്‍ പല പേരിലും അറിയപ്പെടാറുണ്ടെന്നും സ്വയം ഹിറ്റ് മേക്കര്‍ എന്ന് വിശേഷിപ്പിക്കുന്ന ഇയാള്‍ നിരവധി ആര്‍ട്ടിസ്റ്റുകളില്‍ നിന്നും പണം തട്ടിയിട്ടുണ്ട് എന്നും ഷാന്‍ പറഞ്ഞു. ശ്യാമിന്റെ ഫോട്ടോയും ഷാന്‍ പോസ്റ്റ് ചെയ്തിട്ടുണ്ട്.
Top