ഡീസൽ വാഹന നിരോധനം നീക്കാനാവില്ലെന്ന്​ ഹരിത ട്രൈബ്യൂണൽ; കേന്ദ്രത്തിൻറെ ഹർജി തള്ളി

ദില്ലിയിൽ പത്ത്​ വർഷം പഴക്കമുള്ള ഡീസൽ വാഹനങ്ങൾക്ക്​ ഏർപ്പെടുത്തിയിരിക്കുന്ന വിലക്ക്​ നീക്കാനാവില്ലെന്ന്​ ഹരിതട്രിബ്യൂണൽ. കേന്ദ്രസർക്കാർ നൽകിയി ഹർജി തള്ളികൊണ്ടാണ്​ ഹരിതട്രിബ്യൂണലിന്റെ ഉത്തരവ്​. ജസ്റ്റിസ്​ സ്വന്തർ കുമാർ അധ്യക്ഷനായ ബെഞ്ചാണ്​ കേന്ദ്രസർക്കാറിന്റെ അപേക്ഷ തള്ളിയത്​. ഡീസൽ വാഹനങ്ങൾ മാത്രമാണ്​ മലിനീകരണമുണ്ടാക്കുന്നതെന്നത്​ തെറ്റായ വാദമാണെന്നായിരുന്നു കേന്ദ്രസർക്കാർ ഹർജിയിൽ പ്രധാനമായും ചൂണ്ടിക്കാട്ടിയിരുന്നത്​.ഡീസൽ വാഹനങ്ങൾ ഗുരുതരമായ പരിസ്ഥിതി മലിനീകരണമാണ്​ ഉണ്ടാക്കുന്നത് . ഇതിന്റെ ഫലമായാണ് ഡീസൽ കാറുകൾക്ക് വിലക്ക് ഏർപ്പെടുത്തിയത്. ഒരു ഡീസൽ വാഹനം ഉണ്ടാക്കുന്ന മലിനീകരണം 24 പെട്രോൾ വാഹനങ്ങളും 40 സി.എൻ.ജി വാഹനങ്ങളും ഉണ്ടാക്കുന്ന മലിനീകരണത്തിന്​ തുല്യമാണ്​. വര്‍ധിച്ചുവരുന്ന വായു മലിനീകരണത്തിന് പരിഹാരമെന്നോണമാണ് ദില്ലിയിൽ ഡീസല്‍ വാഹനങ്ങള്‍ക്ക് നിരോധനം ഏര്‍പ്പെടുത്തി കൊണ്ടുള്ള ഹരിത കോടതി ഉത്തരവിട്ടത്. ദില്ലിയിൽ നിലവില്‍ ഓടുന്ന 27 ലക്ഷം വാഹനങ്ങളില്‍ 5-6ലക്ഷം മാത്രമാണ് ഡീസല്‍ വാഹനങ്ങള്‍. ഇവയുടെ നിരോധനം മൂലം ദില്ലിയിൽ വായുമലിനീകരണത്തിന് കുറവുണ്ടാവുമെന്നാണ് വിലയിരുത്തല്‍.