മക്കളെ സാഹസികത പരിശീലിപ്പിക്കുന്നവർ സൂക്ഷിക്കുക; അപകടം നിറഞ്ഞ ബൈപാസിലൂടെ പിഞ്ചു കുട്ടിയെക്കൊണ്ട് സ്കൂട്ടർ ഓടിപ്പിച്ച യുവാവിന്റെ ദൃശ്യങ്ങൾ വൈറലാകുന്നു

കൊച്ചി∙ തിരക്കേറിയ ഇടപ്പള്ളി – ആലുവ ബൈപാസിലൂടെ കുട്ടിയെക്കൊണ്ട് ഇരുചക്ര വാഹനമോടിപ്പിച്ച പിതാവിന്റെ ചിത്രങ്ങൾ വൈറലാകുന്നു. തിരക്കേറിയ ബൈപാസിലൂടെയാണ് കുടുംബത്തിന്റെ സാഹസികത. ഒരു പിഞ്ചുകുഞ്ഞിനെയും മാതാപിതാക്കളെയും സ്കൂട്ടറിന്‍റെ പിന്നിലിരുത്തിയാണ് ആൺകുട്ടി സ്കൂട്ടറോടിച്ചത്.

സ്വകാര്യ ബസുകളും കാറുകളും ചീറിപ്പായുന്നതിനിടെയായിരുന്നു അപകട യാത്ര. രണ്ടു കുഞ്ഞുങ്ങളെയും കൊണ്ടു മാതാപിതാക്കളാണ് സ്കൂട്ടറിൽ യാത്ര ചെയ്യുന്നത്.ഡ്രൈവർ സീറ്റിലിരിക്കുന്നത് പിതാവാണെങ്കിലും സ്കൂട്ടറിന്റെ ഹാൻഡിൽ നിയന്ത്രിക്കുന്നത് ഒരു പിഞ്ചുകുട്ടിയാണ്. കൊച്ചി മെട്രോ റെയിലിന്റെ ദൃശ്യങ്ങൾ പകർത്താൻ ക്യാമറ തിരിച്ച മനോരമ ന്യൂസ് ക്യാമറമാൻ ജയ്ജി മാത്യുവിന്റെ ഫ്രെയിമിലേക്കാണ് നാലംഗ കുടുംബം സഞ്ചരിച്ച ഈ ഇരുചക്രവാഹനം ഇരമ്പിക്കയറിയത്.