സിനിമയിൽ കള്ളപ്പണക്കാരുണ്ട്: രഹസ്യങ്ങൾ പലരും എനിക്കറിയാം: ജഗദീഷ് തുറന്നു പറയുന്നു

സിനിമാ ഡെസ്‌ക്

കൊച്ചി: മലയാള സിനിമയിൽ നിന്നും അപ്രഖ്യാപിത വിലക്ക് നേരിട്ട് ചാനൽ രംഗത്ത് ഒതുങ്ങി നിൽക്കുന്ന ജഗദീഷ് മലയാള സിനിമയിലെ സൂപ്പർ താരങ്ങൾ അടക്കമുള്ളവരുടെ കള്ളപ്പണത്തിനെതിരെ പൊട്ടിത്തെറിക്കുന്നു. മലയാളത്തിലെ എല്ലാ നടന്മാരുടെയും സ്വത്ത് വിവരങ്ങൾ പരിശോധിക്കണമെന്ന ആവശ്യവുമായാണ് ജഗദീഷ് പൊട്ടിത്തെറിക്കുന്നത്. ടൈംസ് ഓഫ് ഇന്ത്യയ്ക്കു നൽകിയ അഭിമുഖത്തിലാണ് ജഗദീഷ് ഇക്കാര്യം ആവശ്യപ്പെട്ടത്.
ഇന്ന് സിനിമാ രംഗത്തെ പ്രതിഫലം കോടികളാണ്. മുമ്പത്തെ സ്ഥിതി ഇതായിരുന്നില്ല. എന്നിട്ടും വരവിൽ കവിഞ്ഞ സ്വത്തുള്ള നടന്മാർ ഈ രംഗത്തുണ്ട്. ഞാനിതു പറയുമ്പോൾ അസൂയ കൊണ്ടു പറയുന്നതാണെന്നു പറയും. അതുകൊണ്ടുതന്നെ ഞാനുൾപ്പെടെയുള്ള നടന്മാരുടെ സ്വത്തുവിവരങ്ങൾ അന്വേഷിക്കണം ജഗദീഷ് പറയുന്നു. മലയാള സിനിമാ രംഗത്ത് എനിക്കറിയാവുന്ന ഒരുപാട് രഹസ്യങ്ങളുണ്ട്. അതിനേക്കാളേറെ മുതിർന്ന താരങ്ങൾക്ക് അറിയാമെന്നും ജഗദീഷ് പറഞ്ഞു.
നടി ആക്രമിക്കപ്പെട്ടതുമായി ബന്ധപ്പെട്ട് ഒരു പ്രതികരണവും നടത്തരുതെന്ന് അസോസിയേഷൻ നിർദേശിച്ചിട്ടുണ്ടെന്നും അദ്ദേഹം പറഞ്ഞു. ഹൈവേയിൽ കാളവണ്ടിയിൽ പോകുന്നയാളാണ് ഞാൻ. സൂപ്പർഫാസ്റ്റുകളിൽ പോകുന്നവരെ തിരുത്താൻ ഞാൻ ആളല്ല. സത്യം എന്താണെന്ന് അന്വേഷിച്ച് പുറത്തുകൊണ്ടുവരാത്ത മാധ്യമങ്ങളെയേ ഞാൻ കുറ്റംപറയൂ ജഗദീഷ് പറഞ്ഞു.
സിനിമാ വ്യവസായത്തെക്കുറിച്ച് മന്ത്രി ജി. സുധാകരൻ പറഞ്ഞ കാര്യങ്ങൾ ശരിയാണെന്നും ജഗദീഷ് അഭിപ്രായപ്പെട്ടു. സിനിമാ മേഖലയെ സംബന്ധിച്ച് അന്വേഷണ പരമ്പരകൾക്ക് തന്നെ സാധ്യതയുണ്ട്. ചില നടന്മാരുടെ വൻ സമ്പത്തിന്റെ രഹസ്യം എന്താണ്? അതെല്ലാം അഭിനയത്തിലൂടെ മാത്രം ഉണ്ടാക്കിയതാണോ? അതൊക്കെ അന്വേഷിക്കണം അദ്ദേഹം പറഞ്ഞു