ദിലീപ് കാവ്യ ബന്ധം: സംശയ രോഗികൾക്കു മറുപടിയുമായി നാദിർഷയുടെ വീഡിയോ

സ്‌പെഷ്യൽ റിപ്പോർട്ട്

വാഷിങ്ടൺ: ദിലീപ് കാവ്യ വിവാഹം കഴിഞ്ഞപ്പോൾ മുതൽ ഇരുവരുടെയും ബന്ധം സംബന്ധിച്ചു വിവിധ കോണിൽ നിന്നു സംശയങ്ങൾ ഉയർന്നിരുന്നു. ഈ സംശയങ്ങൾക്കുള്ള മറുപടിയുമായാണ് ഫെയ്‌സ്ബുക്ക് ലൈവിൽ സംവിധായകനും ദിലീപിന്റെ സുഹൃത്തുമായ നാദിർഷാ എത്തിയിരിക്കുന്നത്. അമേരിക്കൻ ഷോയ്ക്കിടയിൽ നിന്നുള്ള നാദിർഷായുടെ വീഡിയോ ഇതിനോടകം തന്നെ വൈറലായി കഴിഞ്ഞു.
ദിലീപ് അമേരിക്കയിലേക്ക് കാവ്യയെ നിർബന്ധിച്ചുവിളിച്ചുകൊണ്ടുപോയിയെന്നും, ദിലീപ് മകളോട് വഴക്കിട്ട്, മീനാക്ഷിയെ നാട്ടിലിട്ടാണ് അമേരിക്കയിലേക്ക് പോയതെന്നുവരെയും വാർത്തകൾ ആഘോഷിക്കപ്പെട്ടു. ഈ പ്രചരണങ്ങൾക്കാകെ മറുപടിയായി ഇതാ അമേരിക്കയിലെ പ്രശസ്തമായ ഗ്രാന്റ് കന്ന്യോയോണിൽ നിന്നുള്ള വീഡിയോയാണ് എത്തിയിരിക്കുന്നത്.

ദിലീപ് അമേരിക്കയിലെ പരിപാടിക്കായി പുറപ്പെട്ടത് കാവ്യയ്ക്കും മീനാക്ഷിക്കുമൊപ്പമാണെന്ന് വ്യക്തമാക്കുന്നതാണ് നാദിർഷയുടെ വീഡിയോ. മീനാക്ഷി നാട്ടിലാണെന്ന് പ്രചരിപ്പിച്ചവർക്കുള്ള മറുപടിയായാണ് ഈ വീഡിയോയെന്ന് ഇത് കണ്ട് പലരും ഫെയ്സ്ബുക്കിൽ പ്രതികരിച്ചിട്ടുമുണ്ട്. കാവ്യയെയും മീനാക്ഷിയെയും ചേർത്ത് പിടിച്ച് നിൽക്കുന്ന ദിലീപിനെയാണ് വീഡിയോയിൽ കാണുന്നത്. കഴിഞ്ഞദിവസം അമേരിക്കയിൽ നിന്ന് പുറത്തുവന്ന ഒരു ചിത്രത്തിൽ ദിലീപും കാവ്യയും അകന്നുനിന്നു എന്നുവരെ കേരളത്തിൽ വാർത്തകൾ പുറത്തുവന്നിരുന്നു. ആ സംശയരോഗികൾക്കുള്ള മറുപടി കൂടിയാണ് നാദിർഷ വീഡിയോയിലൂടെ നൽകുന്നത്.
ലോകത്തിലെ പ്രധാന അദ്ഭുതങ്ങളിലൊന്നായ ഗ്രാൻഡ് കന്ന്യോണിലാണ് താനെന്ന് പറഞ്ഞ് നാദിർഷയാണ് വീഡിയോയിൽ ആദ്യം പ്രത്യക്ഷപ്പെടുന്നത്. പിന്നീട് ഭാര്യയെ പരിചയപ്പെടുത്തുമ്പോൾ പേര് മറന്നുപോകുന്ന നാദിർഷയെയും കാണാം. ശേഷം മക്കളായ ഖദീജയെയും ആയിഷയെയും നാദിർഷ പരിചയപ്പെടുത്തുന്നു. ശേഷം സമദും ഏലൂർ ജോർജും വീഡിയോയിലെത്തുന്നു. ശേഷമാണ് ദിലീപും മീനൂട്ടിയും കാവ്യയും വീഡിയോയിലെത്തുന്നത്. സുബി സുരേഷ്, നമിതാ പ്രമോദ് എന്നിവരാണ് വീഡിയോയിൽ പിന്നീടെത്തുന്നത്. പിന്നീട് എത്തുന്നത് ഒരു കൂതറക്കൂട്ടമാണ്. ഈശ്വരചിന്തയിൽ എന്ന് തുടങ്ങുന്ന ഗാനവുമായാണ് ധർമ്മജനും പിഷാരടിയും അടങ്ങിയ സംഘമെത്തുന്നത്. ശേഷം അമേരിക്കയിൽ കൂവി ബഹളം വെച്ച് ചിരിക്കുന്ന ഈ കൂട്ടത്തെയാണ് കാണാനാവുക. ഇതിലെല്ലാം സജീവമായിത്തന്നെ മീനാക്ഷിയുമുണ്ട്. ദിലീപ് ഷോയ്ക്കായാണ് ദിലീപും സംഘവും അമേരിക്കയിലെത്തിയത്. ദിലീപ്-നാദിർഷ-പിഷാരടി-ധർമ്മജൻ ടീമിന്റെ കോമഡി തന്നെയാണ് പരിപാടിയുടെ പ്രധാന ഐറ്റം.
ആരൊക്കെയാണ് കൂടെയുള്ളത് എന്ന് നാദിർഷ പരിചയപ്പെടുത്തുമ്പോളും അതിനൊരു മറുപടിയുടെ സ്വഭാവം തന്നെയാണ് കൈവരുന്നത്. ദിലീപ് ഫാൻസ് ഭീഷണിപ്പെടുത്തിയെന്നും, മീനാക്ഷിയെ കൂടെക്കൂട്ടാതെയാണ് ദിലീപ് അമേരിക്കയ്ക്ക് പോയതെന്നും, കാവ്യ-ദിലീപ് ബന്ധത്തിൽ അകൽച്ചയുണ്ടെന്നുമെല്ലാം പറഞ്ഞ് ഒരു മാധ്യമപ്രവർത്തകനും രംഗത്തെത്തിയിരുന്നു. ഇതിനെല്ലാമുള്ള മറുപടിയായി തന്നെയാണ് ഈ വീഡിയോ വിലയിരുത്തപ്പെടുന്നത്. മാധ്യമങ്ങൾ തന്റെ ജീവിതത്തിൽ ധാർമ്മികതയുടെ കണികപോലുമില്ലാതെ കടന്നാക്രമണം നടത്തുകയാണെന്ന ആരോപണവുമായി മുൻപ് ദിലീപ് രംഗത്തെത്തിയിരുന്നു.