കൊച്ചി:കൊച്ചിയിൽ യുവ നടി പീഡിപ്പിക്കപ്പെട്ട കേസില്‍ കാവ്യയുടെ സഹോദരനെ ചോദ്യം ചെയ്തു. കേസിന്റെ അന്വേഷണവുമായി ബന്ധപ്പെട്ട് നടി കാവ്യാമാധവന്റെ സഹോദരന്‍ മിഥുനെയാണ് അന്വേഷണ സംഘം ചോദ്യം ചെയ്തത്. തന്റെ വിവാഹത്തിന് പള്‍സര്‍ സുനി പങ്കെടുത്തിരുന്നെന്ന് ചോദ്യം ചെയ്യലില്‍ മിഥുന്‍ പോലീസിന് മുമ്ബാകെ സമ്മതിച്ചു. ഡ്രൈവറായാണ് സുനി വിവാഹത്തില്‍ പങ്കെടുത്തതെന്നാണ് മിഥുന്റെ മൊഴി.
കേസിന്റെ തുടര്‍ അന്വേഷണത്തിന്റെ ഭാഗമായി വിവാഹ പാര്‍ട്ടിയുടെ ദൃശ്യങ്ങളും മറ്റും അന്വേഷണ സംഘം പിടിച്ചെടുത്തു. നടി ആക്രമിക്കപ്പെട്ട കേസിലെ മാഡം കാവ്യയാണെന്ന് സുനി കഴിഞ്ഞദിവസം വെളിപ്പെടുത്തിയിരുന്നു.2014 ഏപ്രില്‍ മാസമായിരുന്നു മിഥുന്‍ മാധവന്റെ വിവാഹം. സുനിയെ അറിയില്ലെന്ന കാവ്യയുടെ വാദങ്ങള്‍ പൊളിക്കാനാണ് അന്വേഷണ സംഘം ഇപ്പോള്‍ ശ്രമിക്കുന്നത്. കാവ്യയുടെ മൊഴി കള്ളമാണെന്ന് തെളിയിക്കുന്ന കൂടുതല്‍ തെളിവുകളാണ് അന്വേഷണസംഘത്തിന് ഇപ്പോള്‍ ലഭിച്ചിരിക്കുന്നത്.
2015 ഏപ്രില്‍ മാസം കാവ്യയുടെ വെണ്ണലയിലെ വില്ലയില്‍ സുനി എത്തിയതിനും പോലീസിന്റെ കൈയില്‍ തെളിവുകളുണ്ട്. പള്‍സര്‍ ബൈക്കിലെത്തിയ സുനിയുടെ ബൈക്ക് നമ്ബറും മൊബൈല്‍ നമ്ബറും പേരും വില്ലയുടെ സെക്യൂരിറ്റി രജിസ്റ്ററില്‍ രേഖപ്പെടുത്തിയിട്ടുണ്ട്. വീട്ടിലെത്തിയ സുനി കാവ്യാമാധവന്റെ അച്ഛനേയും അമ്മയേയും അവരുടെ കാറില്‍ കയറ്റി പുറത്തേക്ക് പോയതിനും പോലീസിന് തെളിവുകള്‍ ലഭിച്ചിട്ടുണ്ട്. ഇക്കാര്യം ചോദ്യം ചെയ്യലില്‍ സുനിയും സമ്മതിച്ചിരുന്നു.
Top