കൊച്ചി: ആവേശം നിറഞ്ഞ കളികളത്തില്‍ കേരളം പൊരുതി നേടി. കൊച്ചിയില്‍ നടന്ന മല്‍സരത്തില്‍ നോര്‍ത്ത് ഈസ്റ്റ് യുണൈറ്റഡിനെ എതിരില്ലാത്ത ഒരു ഗോളിന് തോല്‍പ്പിച്ചാണ് ബ്ലാസ്റ്റേഴ്സ് സെമിയില്‍ കടന്നത്. കൊച്ചിയുടെ സ്വന്തം മണ്ണില്‍ മലയാളി താരം സി.കെ. വിനീത് ഒരിക്കല്‍ക്കൂടി തിളങ്ങിയതോടെ കേരളത്തിന് സ്വപ്‌ന നേട്ടം.
66-ാം മിനിറ്റിലായിരുന്നു വിനീതിന്റെ വിജയഗോള്‍. സീസണിലെ ആറാം മല്‍സരം കളിക്കുന്ന വിനീതിന്റെ അഞ്ചാം ഗോളാണിത്. മൂന്നു ഐഎസ്എല്‍ സീസണുകളില്‍ ബ്ലാസ്റ്റേഴ്സിന്റെ രണ്ടാം സെമിഫൈനലും. ആദ്യ സീസണില്‍ ഫൈനല്‍ കളിച്ച ബ്ലാസ്റ്റേഴ്സ് രണ്ടാം സീസണില്‍ അവസാന സ്ഥാനത്തായിരുന്നു.
ഈ വിജയത്തോടെ 14 കളികളില്‍നിന്ന് ബ്ലാസ്റ്റേഴ്സിന് 22 പോയിന്റായി. ഒന്നാം സ്ഥാനക്കാരായ മുംബൈയ്ക്ക് ഒരു പോയിന്റ് മാത്രം പിന്നില്‍. മാത്രമല്ല, ഉദ്ഘാടന മല്‍സരത്തിലെ തോല്‍വിക്ക് പകരം വീട്ടാനും ബ്ലാസ്റ്റേഴ്സിനായി. നോര്‍ത്ത് ഈസ്റ്റിന്റെ തട്ടകത്തില്‍ നടന്ന മല്‍സരത്തില്‍ ഇതേ സ്‌കോറിനായിരുന്നു ബ്ലാസ്റ്റേഴ്സിന്റെ തോല്‍വി. സീസണില്‍ ബ്ലാസ്റ്റേഴ്സിന്റെ ആറാം വിജയമാണിതെന്ന പ്രത്യകതയുമുണ്ട്. ആറും കൊച്ചിയില്‍ത്തന്നെ.
സെമിയില്‍ ഡല്‍ഹി ഡൈനാമോസാണു കേരളത്തിന്റെ എതിരാളികള്‍. ഇതര സെമിയില്‍ മുംബൈ സിറ്റി എഫ്സി, അത്ലറ്റികോ ഡി കൊല്‍ക്കത്തയെ നേരിടും.
Top