തന്നെ അവര്‍ കൊല്ലുമെന്ന് മരിക്കുന്നതിന് മുമ്പ് മൈക്കിള്‍ ജാക്‌സന്‍ മുന്‍കൂര്‍ സന്ദേശങ്ങള്‍ സുഹൃത്തുക്കള്‍ക്ക് അയച്ചിരുന്നു; ലോകം ഇന്നേ വരെ കണ്ട ഏറ്റവും വലിയ ഗായകന്റെ മരണത്തിലെ ദുരൂഹത മായുന്നില്ല

ലോകം കണ്ടതിൽ വച്ചേറ്റവും വിശ്രുതനായ ഗായകനായ മൈക്കിള്‍ ജാക്സന്റെ മരണവുമായി ബന്ധപ്പെട്ട നിഗൂഢതകൾ കൂടുതൽ സങ്കീർണമായി വരുന്നുവെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്.മരിക്കുന്നത് മുമ്പ് തന്നെ വിഖ്യാത പാട്ടുകാരന്‍ മൈക്കിള്‍ ജാക്‌സന്‍ താന്‍ കൊല്ലപ്പെടുമെന്ന് ഭയപ്പെട്ടിരുന്നതായും തന്നെ അവര്‍ കൊല്ലുമെന്ന് ഭയന്ന് മുന്‍കൂര്‍ സന്ദേശങ്ങള്‍ കൈമാറിയിരുന്നതായും വെളിപ്പെടുത്തല്‍. ഇക്കാര്യം വ്യക്തമാക്കി അദ്ദേഹം തന്റെ അടുത്ത സുഹൃത്തുക്കളില്‍ ഒരാളും ജര്‍മ്മന്‍ ബിസിനസുകാരനുമായ സുഹൃത്ത് മൈക്കിള്‍ ജേക്കബ് ഷാഗന് കുറിപ്പ് നല്‍കിയിരുന്നതായി ഇദ്ദേഹം വെളിപ്പെടുത്തി.ഓസ്ട്രേലിയൻ ടിവി ഷോയ്ക്ക് വേണ്ടി ബ്രോഡ്കാസ്റ്ററായ ഡാഫ്നെ ബരാക്കിന് നൽകിയ അഭിമുഖത്തിലാണ് അദ്ദേഹം ഞെട്ടിപ്പിക്കുന്ന ഈ വിവരം പുറത്ത് വിട്ടിരിക്കുന്നത്.

2009 ല്‍ ഉറങ്ങാനുള്ള മരുന്ന് അമിതമായി കഴിച്ചതാണ് മൈക്കിള്‍ ജാക്‌സന്റെ മരണകാരണമായി പറഞ്ഞിരുന്നത്. എന്നാല്‍ ജാക്‌സന്‍ കൊല്ലപ്പെടുകയായിരുന്നെന്നാണ് മകള്‍ പാരീസിന്റെയും സഹോദരി ലാ ടോയയുടേയും അഭിപ്രായം. മരിക്കുന്നതിന് ആഴ്ചകള്‍ക്ക് മുമ്പാണ് താന്‍ വധിക്കപ്പെടുമെന്ന് ഭയന്ന് ജാക്‌സന്‍ സുഹൃത്തിന് കുറിപ്പടി കൈമാറിയത്. ”അവര്‍ എന്നെ കൊല്ലാന്‍ ശ്രമിക്കുന്നുണ്ട്. എനിക്ക് ജീവനില്‍ ഭീതിയുണ്ട്.” എന്ന് കുറിച്ച 13 സന്ദേശങ്ങളാണ് ജാക്‌സന്‍ നല്‍കിയത്

ലാസ് വേഗസ്സിൽ നിന്നായിരുന്നു മരണഭയത്താൽ ജാക്സൻ തന്നെ വിളിച്ചിരുന്നതെന്ന് ജേക്കബ്ഷാഗെൻ വിശദികരിക്കുന്നു. ലണ്ടനിലെ ഒ2 ടൂറിന് പോകാനിരുന്ന ജാക്സൻ തന്നോട് ജർമനിയിൽ നിന്നും വിമാനം കയറി യുഎസിലേക്ക് തന്റെ അടുത്തേക്ക് വരാൻ യാചിച്ചിരുന്നുവെന്നും ജേക്കബ്ഷാഗെൻ വേദനയോടെ ഓർക്കുന്നു. തുടർന്ന് യുഎസിലേക്ക് പോയ താൻ ജാക്നസനൊപ്പം മൂന്ന് ദിവസംചെലവഴിച്ചിരുന്നുവെന്നും ഈ സുഹൃത്ത് വെളിപ്പെടുത്തിയിട്ടുണ്ട്. അപ്പോൾ കൈമാറിയിരുന്ന കുറിപ്പിലും അവർ തന്നെ കൊലചെയ്യുമെന്ന് ജാക്സൻ ആശങ്കപ്പെട്ടിരുന്നുവെന്ന് ജേക്കബ്ഷാഗെൻ വെളിപ്പെടുത്തുന്നു. എന്നാൽ അവർ ആരാണെന്ന് ജാക്സൻ ഇദ്ദേഹത്തോട് ഒരിക്കലും വെളിപ്പെടുത്തിയിരുന്നുമില്ല.

എന്നാൽ ചില നോട്ടുകളിൽ ലണ്ടനിലെ തന്റെ കോൺസേർട്ടുകൾ സംഘടിപ്പിക്കുന്ന പ്രമോട്ടർമാരായ എഇജിയുടെ പേര് ജാക്സൻ പരാമർശിച്ചിട്ടുമുണ്ട്. എഇജി തനിക്ക് മേൽ കടുത്ത സമ്മർദം ചെലുത്തുന്നുവെന്ന് ചില നോട്ടുകളിൽ ജാക്സൻകുറിച്ചിരിക്കുന്നു. തന്റെ ജീവിതത്തെ കുറിച്ച് താൻ ഉത്കണ്ഠപ്പെടുന്നുവെന്നും താരം വെളിപ്പെടുത്തിയിരുന്നു. തുടർന്ന് ആഴ്ചകൾക്ക് ശേഷമായിരുന്നു ജാക്സൻ മരിച്ച നിലയിൽ കാണപ്പെട്ടിരുന്നത്. സെഡേറ്റീവ് പ്രോപോഫോൾ അമിതമായി കഴിച്ചതാണ് മരണത്തിനുള്ള ഔദ്യോഗിക കാരണമായി ചൂണ്ടിക്കാണിക്കപ്പെട്ടിരുന്നത്.

ഈ അപകടകരമായ മയക്കുമരുന്ന് കൈകാര്യം ചെയ്ത് മരണത്തിന് കാരണക്കാരനായ കുറ്റത്തിന് ജാക്സന്റെ പഴ്സണൽ ഡോക്ടർ കോണാർഡ് മുറേയെ നാല് വർഷത്തെ ജയിൽ ശിക്ഷയ്ക്ക് വിധേയനാക്കിയിട്ടുമുണ്ട്. എന്നാൽ തന്റെ ഇൻസോംമ്നിയ ചികിത്സയുടെ ഭാഗമായി ഒരു ദശാബ്ദക്കാലത്തിലധികമായി ജാക്സൻ പ്രൊപോഫോൾ ഉപയോഗിക്കുന്നുണ്ടെന്നാണ് ജേക്കബ്ഷാഗൻ വെളിപ്പെടുത്തുന്നത്. തന്റെ അച്ഛൻ കൊല്ലപ്പെട്ടതാണെന്ന ആരോപണവുമായി ജാക്സന്റെ 19 കാരിയായ മകൾ അടുത്തിടെ രംഗത്ത് വന്നിരുന്നു. ഈ ആരോപണത്തിന് തെളിവായി ജാക്സന്റെ നോട്ടുകൾ ഹാജരാക്കുമെന്നാണ് ജേക്കബ്ഷാഗൻ പറയുന്നത്. ജാക്‌സന്റെ ചരമവാര്‍ഷികമായ അടുത്ത മാസം ജേക്കബ്ഷാഗന്റെ ഇന്റർവ്യൂ ഓസ്ട്രേലിയ, യുഎസ്, തുടങ്ങിയിടങ്ങളിൽ പ്രക്ഷേപണം ചെയ്യുകയാണ്.34 കാരനായ ഷാഗണ് ജാക്‌സനുമായി ഇരുപത് വര്‍ഷത്തെ സൗഹൃദമായിരുന്നു.