മുംബൈ: അയ്യക്കും ഔറങ്കസേബിനും ശേഷം പൃഥ്വിരാജ് അഭിനയിക്കുന്ന ബോളിവുഡ് ചിത്രം നാം ഷബാനയുടെ ഒഫീഷ്യല്‍ ട്രെയിലര്‍ പുറത്തിറങ്ങി. പൃഥ്വിയുടെ ആരാധകര്‍ ഏറെ കാത്തിരിക്കുന്ന ബോളിവുഡ് ചിത്രത്തില്‍ അദ്ദേഹത്തിന് വില്ലന്‍ വേഷമാണ്. തപ്സി പന്നുവാണ് ഷബാന എന്ന ടൈറ്റില്‍ കഥാപാത്രമായെത്തുന്നത്. സൂപ്പര്‍ താരം അക്ഷയ് കുമാര്‍ അതിഥി വേഷത്തിലെത്തും.
ഇന്ന് റിലീസ് ചെയ്ത ട്രെയ്ലര്‍ സോഷ്യല്‍ മീഡിയയില്‍ വൈറലായിക്കൊണ്ടിരിക്കുകയാണ്. റിലീസ് ചെയ്തു മണിക്കൂറുകള്‍ക്കം അഞ്ചുലക്ഷത്തിലധികം പേര്‍ വീഡിയോ കണ്ടുകഴിഞ്ഞു.
പൃഥ്വിയുടെ കഥാപാത്രത്തിന്റെ കൂടുതല്‍ വിവരങ്ങള്‍ പുറത്തുവിട്ടിട്ടില്ല. വില്ലന്‍ കഥാപാത്രത്തെയാണ് പൃഥ്വി അവതരിപ്പിക്കുന്നതെന്നാണ് വിവരം. തമിഴ് ചിത്രമായ കാവ്യ തലൈവന്‍, കനാ കണ്ടേന്‍, തെലുങ്കു ചിത്രമായ പൊലീസ് പൊലീസ് എന്നിവയില്‍ പൃഥ്വി വില്ലനായി മുമ്പ് അഭിനയിച്ചിട്ടുണ്ട്. മാര്‍ച്ച് 31ന് ആണ് റിലീസ്.
2015ല്‍ പുറത്തിറങ്ങിയ ബേബി എന്ന ചിത്രത്തിലെ തപ്സിയുടെ കഥാപാത്രത്തിന്റെ പൂര്‍വകാലമാണ് നാം ഷബാന പറയുന്നത്. ആക്ഷന്‍ പശ്ചാത്തലത്തിലൊരുങ്ങുന്ന ചിത്രത്തില്‍ അനുപം ഖേര്‍, മനോജ് ബാജ്പേയി, ഡാനി ഡെന്‍സോങ്പാ, എല്ലി അവ്രാം, മധുരിമ തുളി എന്നിവരും അഭിനയിക്കുന്നു. ഫ്രാന്‍സില്‍ നിന്നുള്ള സിറിള്‍ റാഫേലി, അബ്ബാസ് അലി ഖാന്‍ എന്നിവരാണ് ചിത്രത്തിലെ സംഘട്ടന രംഗങ്ങള്‍ ഒരുക്കുന്നത്.
ശിവം നയാര്‍ സംവിധാനം ചെയ്യുന്ന നാം ഷബാന നിര്‍മ്മിക്കുന്നത് സംവിധായകനായ നീരജ് പാണ്ഡേയാണ്. ചിത്രം മാര്‍ച്ച് 31ന് തിയേറ്ററുകളിലെത്തും.
Top