ഡാള്ളസിൽ ഡോ.എം.വി പിള്ള നടൻ ശ്രീജിത്ത് എന്നിവർക്കു സ്വീകരണം നൽകി

പി.പി ചെറിയാൻ

ഗാർലന്റ് (ടെക്‌സസ്): ഇന്റർനാഷണൽ നെറ്റ് വർക്ക് ഫോർ കാൻസർ ട്രീറ്റ്‌മെന്റ് ആൻഡ് റിസേർച്ചിന്റെ തലവനായി നിയമിക്കപ്പെട്ട ഡോ.എംവി പിള്ളയെ ആദരിക്കലും കേരളത്തിൽ നിന്നുള്ള പ്രമുഖ ചലച്ചിത്ര നടൻ ശ്രീജിത്ത് സുകുമാരനു സ്വീകരണവും കേരള അസോസിയേഷൻ ഓഫ് ഡാള്ളസ് ഇന്ത്യൻ കൾച്ചറൽ ആൻഡ് എഡ്യുക്കേഷൻ എന്നീ സംഘടനകളുടെ ആഭിമുഖ്യത്തിൽ ഡാള്ളസിൽ സംഘടിപ്പിച്ചു.
ഗാർലന്റെ ബെൽറ്റ് ലൈനിലുള്ള കേരള അസോസിയേഷൻ കോൺഫറൻസ് ഹാളിൽ സംഘടിപ്പിച്ച സമ്മേളനത്തിൽ ഡാള്ളസ് ഫോർട്ട് വർത്ത് മേഖലയിൽ നിന്നും നിരവധി ആളുകൾ പങ്കെടുത്തു. കേരള അസോസിയേഷൻ പ്രസിഡന്റ് ബാബു സി.മാത്യു മുഖ്യാതിഥികളെ സദസിനു പരിചയപ്പെടുത്തുകയും സ്വാഗതമാശംസിക്കുകയും ചെയ്തു. ആതുര ശുശ്രൂഷ രംഗത്തും സാമൂഹിക സാംസ്‌കാരിക രംഗത്തും നിറ സാന്നിധ്യമായ ഡോ.എം.വി പിള്ളയെ ആദരിക്കാൻ അവസരം ലഭിച്ചത് കേരള അസോസിയേഷൻ വലിയ നേട്ടമായി കാണുന്നുവെന്നു പ്രസിഡന്റ് സ്വാഗത പ്രസംഗത്തിൽ പറഞ്ഞു.
ശ്രീബോബൻ കൊടുവത്ത് (ഇന്ത്യ കൾച്ചറൽ ആന്റ് എഡ്യുക്കേഷൻ സെന്റർ പ്രസിഡന്റ്) ജോസ് ഓച്ചാലിൽ (ലാനാ പ്രസിഡന്റ്), എബ്രഹാം തെക്കേമുറി (കെഎൽഎസ് പ്രസിഡന്റ്) ഡോ.അബ്ദുൾ റഷീദ് (യുടിഐ പ്രഫസർ) എന്നിവർ ആശംസകൾ അർപ്പിച്ചു പ്രസംഗിച്ചു. തുടർന്നു ഡോ.എം.വി പിള്ള മറുപടി പ്രസംഗം നടത്തി. അസോസിയേഷൻ നൽകിയ സ്വീകരണത്തിനും ആദരവിനും ഡോ.പിള്ള നന്ദി പ്രകാശിപ്പിച്ചു. തുടർന്നു നടൻ ശ്രീജിത്തിനെ അസോസിയേഷൻ സെക്രട്ടറി റോയ് കൊടുവത്ത് പരിചയപ്പെടുത്തുകയും സ്വാഗതം ആശംസിക്കുകയും ചെയ്തു. അപ്രതീക്ഷിതമായി ലഭിച്ച സ്വീകരണത്തിനു ശ്രീജിത്ത് നന്ദി പ്രകാശിപ്പിക്കുകയും ഭാരവാഹികളെ പ്രത്യേകം അഭിനന്ദിക്കുകയും ചെയ്തു. ഡോ.പിള്ളയ്ക്കും ശ്രീജിത്തിനും അസോസിയേഷന്റെ വകയായി മൊമന്റോ ബാബു സി.മാത്യു ആൻസി ജോസഫ് എന്നിവർ നൽകി. ഡാനിയേൽ കുന്നേൽ (ജോ.സെക്രട്ടറി നന്ദി രേഖപ്പെടുത്തി.