ബിജു കരുനാഗപ്പള്ളി
ദുബായിൽ വാഹനാപകടത്തിൽപ്പെട്ട് റോഡരുകിൽ കിടന്ന മലയാളിക്ക് സ്വാന്തനമായി നടൻ ദിലീപ്. ഇന്നലെ ദുബായ് മുഹൈസിനയ്ക്ക് മുന്നിലായിരുന്നു സഭവം. അപകടത്തിൽപ്പെട്ട യുവാവിനെ പിടിച്ചെഴുന്നേൽപ്പിച്ചതും അപകട വിവരം പോലീസിലറിയിച്ചതുമൊക്കെ ദിലീപുതന്നെ.
ഖിസൈസിലെ ഗ്രോസറിയിൽ ഡലിവറി ബോയിയായി ജോലിനോക്കുന്ന വടകര പള്ളിത്തായ സ്വദേശി ജാസിറാണ്(23) കഴിഞ്ഞ ദിവസം അപകടത്തിൽപ്പെട്ടത്. ഇന്നലെ പുലർച്ചെ ഒരുമണിക്കായിരുന്നു സംഭവം. ജോലി കഴിഞ്ഞ് ബൈക്കിൽ മടങ്ങുകയായിരുന്ന ജാസിറിനെ ഒരു കാർ ഇടിച്ച് വീഴ്ത്തുകയായിരുന്നു. ഇടിയുടെ ആഘാതത്തിൽ ജാസിൽ വാഹനത്തിൽനിന്നും തെറിച്ചുവീണു. എന്നാൽ ഇടിച്ച വാഹനം നിർത്താതെ കടന്നുപോവുകയും ചെയ്തു. ശരീര വേദനകാരണം വീണിടത്തുനിന്നും എഴുനേൽക്കാൻ കഴിയാത്ത നിലയിലായിരുന്നു ജാസിർ.
ഈ സമയത്താണ് വെളുത്ത ലാൻഡ് ക്രൂസർ കാറിൽ രക്ഷകനായി ജനപ്രീയ നടൻ എത്തുന്നത്. ദിലീപും ഒപ്പമുണ്ടായിരുന്ന സുഹൃത്ത് നസീറും ചേർന്ന് ജാസിറിനെ പിടിച്ചെഴുന്നേൽപ്പിച്ചു. വിവരങ്ങൾ ചോദിച്ചറിഞ്ഞ ദിലീപ് പോലീസിനെ വിളിച്ച് സംഭവം അറിയിക്കുകയും ചെയ്തു. എന്നാൽ ഇഷ്ട നടനെ അടുത്തുകണ്ട അമ്പരപ്പ് ജാസിറിന് അപ്പോഴും വിട്ടുമാറിയിരുന്നില്ല. കാലിന് ചെറിയ പരിക്ക് പറ്റിയെങ്കിലും ജാസിർ പിന്നീട് താമസ സ്ഥലത്തേയ്ക്ക് മടങ്ങി.
Top