ഡബ്ലിന്‍: കോ കില്‍ഡെയറില്‍ ആതിയ്ക്കു സമീപമുണ്ടായ വെടിവയ്‌പ്പില്‍ പരുക്കേറ്റ്‌ ഗാര്‍ഡാ സംഘം ആശുപത്രിയില്‍ എത്തിച്ച യുവാവ്‌ കൊല്ലപ്പെട്ടു. കോകില്‍ഡെയറില്‍ 22 കാരനായ യുവാവാണ്‌ വെടിയേറ്റു കൊല്ലപ്പെട്ടത്‌. സഭവവുമായി ബന്ധപ്പെട്ട്‌ നാല്‍പ്പതുകാരനായ ഒരാളെ ഗാര്‍ഡാ സംഘം കസ്റ്റഡിയില്‍ എടുത്തിട്ടുണ്ട്‌.
കോ കില്‍ഡെയറില്‍ ഇന്നലെ വൈകിട്ട്‌ അഞ്ചു മണിയോടെയാണ്‌ വെടിവയ്‌പ്പ്‌ ഉണ്ടായത്‌. സംഭവം അറിഞ്ഞെത്തിയപ്പോഴാണ്‌ യുവാവ്‌ വെടിയേറ്റു വീണു കിടക്കുന്നത്‌ ഗാര്‍ഡാ സംഘം കണ്ടെത്തിയത്‌. തുടര്‍ന്നു സംഘം ഇയാളെ ഉടന്‍ തന്നെ ആശുപത്രിയില്‍ എത്തിക്കുകയായിരുന്നു. ഇതിനിടെയാണ്‌ വെടിവയ്‌പ്പു നടത്തിയതായി സംശയിക്കുന്ന നാല്‍പ്പതുകാരനെ ഗാര്‍ഡാ സംഘം കസ്റ്റഡിയില്‍ എടുത്തത്‌.
അക്രമത്തില്‍ പരുക്കേറ്റ യുവാവിനെ നാസ്‌ ജനറല്‍ ആശുപത്രിയില്‍ എത്തിച്ചെങ്കിലും മരിച്ചു. ഇതേ തുടര്‍ന്നു മൃതദേഹത്തിന്റെ പോസ്റ്റ്‌മാര്‍ട്ടം നടപടികള്‍ ഗാര്‍ഡാ സംഘം ആരംഭിച്ചിട്ടുണ്ട്‌. സംഭവമുണ്ടായ സ്ഥലത്ത്‌ സംരക്ഷിത വലയം തീര്‍ത്ത്‌ ഗാര്‍ഡാ സംഘം തെളിവുകള്‍ സംരക്ഷിക്കുന്നതിനുള്ള നടപടികള്‍ ആരംഭിച്ചിട്ടുണ്ട്‌. പ്രതിയെന്നു സംശയിക്കുന്ന നാല്‍പ്പതുകാരനെ കില്‍കെയറിലെ ഗാര്‍ഡാ സ്റ്റേഷനിലേയ്ക്ക്‌ എത്തിക്കുന്നതിനാണ്‌ ഇപ്പോള്‍ തീരുമാനിച്ചിരിക്കുന്നത്‌. ഇയാളെ ഇവിടെ കൊണ്ടു വന്നു ചോദ്യം ചെയ്യും. സംഭവത്തിന്റെ എന്തെങ്കിലും സൂചനകളുള്ള ദൃക്‌സാക്ഷികള്‍ ആയ ആളുകള്‍ അടക്കമുള്ളവര്‍ കില്‍കെയര്‍ ഗാര്‍ഡാ സ്റ്റേഷനില്‍ റിപ്പോര്‍ട്ട്‌ ചെയ്യണമെന്നു ഗാര്‍ഡാ സംഘം അറിയിച്ചു.
Top