മാർച്ച് എട്ടിന് റഫറണ്ടം നടത്താനുള്ള ഔദ്യോഗിക ഉത്തരവിറങ്ങി! റഫറണ്ടം “സങ്കീർണ്ണമെന്ന് സ്വതന്ത്ര തിരഞ്ഞെടുപ്പ് കമ്മീഷൻ അധ്യക്ഷൻ.റഫറണ്ടത്തിന് മുന്നോടിയായി ഇൻഫർമേഷൻ ക്യാമ്പയിൻ ആരംഭിച്ചു

ഡബ്ലിൻ :ഭരണഘടനയുടെ 41-ാം അനുച്ഛേദം ഭേദഗതി ചെയ്യുന്നതിനുള്ള നിർദ്ദേശങ്ങളിൽ രണ്ട് റഫറണ്ടങ്ങൾക്കായി മാർച്ച് 8 വെള്ളിയാഴ്ച പോളിംഗ് ദിവസമായി നിശ്ചയിച്ചുകൊണ്ട് പാർപ്പിട വകുപ്പ് മന്ത്രി ഡാര ഒബ്രിയൻ ഉത്തരവിട്ടു. രാവിലെ 7 മണി മുതൽ രാത്രി 10 മണി വരെയാണ് പോളിംഗ് നടക്കുക. ഏകദേശം 3.3 ദശലക്ഷം ആളുകൾക്ക് നിലവിൽ വോട്ടവകാശമുണ്ട്.

വിവാഹത്തെ അടിസ്ഥാനമാക്കിയുള്ള കുടുംബങ്ങൾ ഒഴികെയുള്ള കുടുംബങ്ങളെ ഉൾപ്പെടുത്തുന്നതിന് കുടുംബത്തിന് നൽകുന്ന പരിരക്ഷ വിശാലമാക്കുന്ന ആർട്ടിക്കിൾ 41.1-ൻ്റെ നിർദ്ദിഷ്ട ഭേദഗതിയെക്കുറിച്ചായിരിക്കും ആദ്യ റഫറണ്ടം.

‘വീട്ടിൽ’ സ്ത്രീകളെക്കുറിച്ചുള്ള പരാമർശം ഉൾപ്പെടുന്ന ആർട്ടിക്കിൾ 41.2 റദ്ദാക്കാനും കുടുംബങ്ങൾക്കുള്ളിലെ പരിചരണത്തിന് അംഗീകാരം നൽകുന്നതിന് പുതിയ ആർട്ടിക്കിൾ 42 ബി ചേർക്കാനുമുള്ള നിർദ്ദേശത്തിലായിരിക്കും രണ്ടാമത്തെ വോട്ട്.

അതേസമയം അയർലണ്ടിൽ അടുത്ത മാർ ച്ച് 8 നു നടക്കുന്ന പ്രധാന റഫറണ്ടം വളരെ സങ്കീർണ്ണത നിറഞ്ഞതാണെന്ന് സ്വതന്ത്ര തിരഞ്ഞെടുപ്പ് കമ്മീഷൻ അധ്യക്ഷൻ .  കുടുംബത്തെയും കുടുംബത്തിലെ പരിചരണത്തെയും കുറിച്ചുള്ള മാർച്ച് 8 ലെ റഫറണ്ടം ഐറീഷ് സമൂഹത്തിൽ സങ്കീർണ്ണത സൃഷ്ടിക്കുമെന്നാണ് സ്വതന്ത്ര തിരഞ്ഞെടുപ്പ് കമ്മീഷൻ അധ്യക്ഷൻ പറയുന്നത് .

റഫറണ്ടത്തിന്റെ വിവരങ്ങൾ അടങ്ങിയ ബുക്ക് ലെറ്റ് 2.3 ദശലക്ഷം വീടുകളിലേക്ക് രാജ്യവ്യാപകമായി അയക്കുന്നതിന്റെ ഭാഗമായി ഒരു ഇൻഫർമേഷൻ കാമ്പയിന്റെ ചടങ്ങിൽ സംസാരിക്കുകയായിരുന്നു ജസ്റ്റിസ് മേരി ബേക്കർ.

മാർച്ച് 8 പോളിംഗ് ദിവസമായി നിശ്ചയിച്ചുകൊണ്ടുള്ള ഉത്തരവിൽ പാർപ്പിട വകുപ്പ് മന്ത്രി ഡാരാ ഒബ്രിയൻ ഒപ്പുവച്ചതിന് ശേഷം റഫറണ്ടങ്ങൾക്കായുള്ള പ്രചാരണങ്ങൾക്ക് ഔദ്യോഗികമായിതുടക്കം കുറിച്ചു . കുടുംബത്തെക്കുറിച്ചും പരിചരണത്തെക്കുറിച്ചും രണ്ട് വ്യത്യസ്ത ചോദ്യങ്ങൾ ജനങ്ങളോട് ചോദിക്കും.

വീടിനുള്ളിലെ സ്ത്രീയുടെ ജീവിതത്തെയും വീടിനുള്ളിലെ അമ്മയുടെ കടമകളെയും പരാമർശിക്കുന്ന ഭരണഘടനയുടെ ആർട്ടിക്കിൾ 41.2 ഇല്ലാതാക്കണോ വേണ്ടയോ എന്ന് വോട്ടർമാരോട് ചോദിക്കും. പകരം ഒരു കുടുംബത്തിലെ അംഗങ്ങളുടെ പരിചരണം സംസ്ഥാനം അംഗീകരിക്കുന്നുവെന്ന് പറയുന്ന ലിംഗ നിഷ്പക്ഷ ഭാഷ ഉപയോഗിച്ച് മാറ്റി എഴുതും.

സമൂഹത്തിലെ സ്വാഭാവിക പ്രാഥമികവും അടിസ്ഥാനപരവുമായ യൂണിറ്റ് ഗ്രൂപ്പായി കുടുംബത്തെ അംഗീകരിക്കുന്ന ആർട്ടിക്കിൾ 41.1 മാറ്റണോ എന്നതാണ് മറ്റൊരു ചോദ്യം.

നിർദിഷ്ട ഭേദഗതിയിൽ കുടുംബം വിവാഹത്തിലോ മറ്റ് സുസ്ഥിര ബന്ധങ്ങളിലോ അധിഷ്ഠിതമാണെന്ന് വിവരണം നൽകും . മാറ്റം വരുത്തുന്ന വാക്കിനെ കുറിച്ച് സംശയങ്ങൾ ഉണ്ടെങ്കിലും, സോഷ്യൽ ഡെമോക്രാറ്റുകളും പീപ്പിൾ ബിഫോർ പ്രോഫിറ്റും ലേബർ പാർട്ടിയും ഇപ്പോൾ അതെ വോട്ടിനെ പിന്തുണക്കുന്നുണ്ട്.

പാർട്ടി ഇതുവരെ ഔദ്യോഗികമായി ഒരു നിലപാട് എടുത്തിട്ടില്ലെങ്കിലും ‘യെസ് ‘ വോട്ടു നൽകി പിന്തുണയ്ക്കുമെന്നത് തന്റെ ധാരണയാണെന്ന് സിൻ ഫെയ്‌നിന്റെ ഇയോൻ ഒബ്രോയിൻ പറഞ്ഞു.യെസ് എന്ന് വോട്ട് ചെയ്തു നിര്‍ദേശങ്ങളെ അംഗീകരിക്കാനോ,നോ എന്ന് വോട്ട് രേഖപ്പെടുത്തി നിര്‍ദേശങ്ങളെ തളളാണോ ഓരോരുത്തര്‍ക്കും അവകാശമുണ്ട്.ലിംഗ സമത്വം സംബന്ധിച്ച സിറ്റിസണ്‍സ് അസംബ്ലിയും സംയുക്ത പാര്‍ലമെന്ററി സമിതിയുമാണ് റഫറണ്ടം നടത്താന്‍ ശുപാര്‍ശ ചെയ്തത്. യൂറോപ്യൻ പാർലമെന്റ് ഇലക്ഷനിൽ വോട്ടർ ലിസ്റ്റിൽ പേര് ചേർത്തിട്ടുള്ളവർക്ക് വോട്ട് ചെയ്യാവുന്നതാണ് .