ഓണാഘോഷം ആവേശകരമാക്കാൻ മെഗാ തിരുവാതിരയും വടം വലിയും! ബ്‌ളാക്ക്‌റോക്ക് സെന്‍റ് ജോസഫ് സീറോ മലബാർ സഭയുടെ ഓണാഘോഷം പൊടിപൊടിക്കും.

ഡബ്ലിൻ :ഈ വർഷത്തെ ഓണാഘോഷം കേമമാക്കാൻ ബ്‌ളാക്ക്‌റോക്കിലെ സീറോ മലബാർ സഭ .മെഗാ തിരുവാതിരയും ആവേശകരമായ വടം വലിയും അടക്കം വമ്പിച്ച കലാ കായിക മത്സരങ്ങൾ ഓണത്തിന് നിറപ്പകിട്ടാകും . സീറോ മലബാർ ബ്‌ളാക്ക്‌റോക്ക് ഇടവകയുടെ ഈ വർഷത്തെ ഓണാഘോഷം ആഗസ്റ്റ് 19 ന് സ്റ്റിൽ ഓർഗനിലുള്ള സെയിന്റ് ബ്രിജിത് ഹാളിൽ ആഗസ്റ്റ് 19 ന് നടക്കും.

കേരള തനിമയോടെ ഒരുക്കുന്ന ഓണത്തിനുള്ള അണിയറ പ്രവർത്തങ്ങൾ പൂർത്തിയായി കഴിഞ്ഞു . കലാകായിക മത്സരങ്ങൾ ആവേശകരമാക്കാൻ വിജയികൾക്ക് വമ്പൻ സമ്മാനങ്ങൾ ആണ് സംഘാടകർ ഒരുക്കിയിരിക്കുന്നത് .ഓണം മത്സര വിജയികൾക്ക് സമ്മാനങ്ങൾ സ്പോൺസർ ചെയ്തിരിക്കുന്നത് അയർലന്റിലെ പ്രമുഖ ഇന്ത്യൻ ഷോപ്പ് ശൃംഗല- ബിസിനസ് സ്ഥാപനമായ ഇൻഗ്രീഡിയൻസ് ഏഷ്യൻ സൂപ്പർ മാർക്കറ്റ് ( Ingredients Asian Supermarket ) ആണ്.

ആഗസ്റ്റ് 19 ന് രാവിലെ 10 മണിമുതൽ വൈകിട്ട് 7 മണിവരെ ആയിരിക്കും ഓണാഘോഷ പരിപാടികൾ രാവിലെ 10 മണിക്ക് കായിക മത്സരങ്ങൾക്ക് തുടക്കം കുറിക്കും. സ്ത്രീകളുടെയും പുരുഷൻമാരുടെയും യുവജന സംഘടനകളുടെയും നേതൃത്വത്തിൽ ആവേശകരമായ വടം വലി അടക്കം വിവിധ കായിക മത്സരങ്ങൾ ഉണ്ടായിരിക്കും. നാല് യൂണിറ്റുകൾ തിരിച്ചുള്ള കലാ കായിക മത്സരങ്ങൾ ആയിരിക്കും അരങ്ങേറുക .

കായിക മത്സരങ്ങൾക്ക് ശേഷം വിപുലമായ ഓണസദ്യയും തുടർന്ന് കലാ മേളയും നടക്കും . മാതൃവേദി നേതൃത്വം കൊടുക്കുന്ന ഡസൻ കണക്കിനാളുകൾ പങ്കെടുക്കുന്ന അമ്മമാരുടെയും യുവതികളുടെയും തിരുവാതിര ഓണാഘോഷത്തിന് പകിട്ട് കൂട്ടും.ഈ വർഷത്തെ ഓണത്തിന്റെ ഒരുക്കങ്ങൾ ഭംഗിയായി നടക്കുന്നതായി ട്രസ്റ്റിമാരായ സിബി സെബാസ്ററ്യന്‍, ബിനു ജോസഫ് ലൂക്ക്, സെക്രട്ടറി മിനിമോള്‍ ജോസ് ,ജോയിൻ്റ് സെക്രട്ടറി റോസ് ബിജു, എന്നിവർ അറിയിച്ചു.

ഓണാഘോഷത്തിൽ പങ്കെടുക്കുവാൻ താല്പര്യം ഉള്ളവർക്ക്  ഓൺലൈനിലൂടെ ബുക്ക് ചെയ്യാമെന്ന് പള്ളി കമ്മറ്റി ഭാരവാഹികൾ അറിയിച്ചു. ഓണാഘോഷത്തിൽ പങ്കെടുക്കാൻ ഏവരെയും സ്നേഹപൂർവം സ്വാഗതം ചെയ്യുന്നതായി ഇടവക വികാരിയും സീറോ മലബാർ സഭ അയർലണ്ട് നാഷണൽ കോർഡിനേറ്ററുമായ റവ. ഫാ ജോസഫ് മാത്യു ഓലിയക്കാട്ടിൽ അറിയിച്ചു.