പുനരൈക്യ വാർഷികവും അനുസ്മരണ സമ്മേളനവും

പി.പി ചെറിയാൻ

മലങ്കര കാത്തോലിക്കാ സഭയുടെ പുനരൈക്യ ശ്രമങ്ങൾക്കു എൺപത്തിയാറ് വർഷങ്ങൾക്കു മുൻപ് വിജയത്തിലെത്തിയതിന്റെ ഓർമ്മ ഡാള്ളസ് മലങ്കര കത്തോലിക്കാ ഇടവകയിൽ പ്രത്യേക അനുസ്മരണ പരിപാടികൾ നടത്തപ്പെട്ടു.
ഇടവകയിൽ സജീവ സംഘടനയായ മലങ്കര കാത്തലിക് അസോസിയേഷന്റെ അഭിമുഖ്യത്തിലായിരുന്നു ആഘോഷങ്ങൾ പ്രിൻസ് വി.സാമുവേൽ സ്വാഗതം അർപ്പിച്ച ചടങ്ങിൽ അൽമായ സമൂഹത്തെ പ്രതിനിധീകരിച്ച് സാം ഫിലിപ്പ് റോയി വർഗീസ് എന്നിവർ സഭയുടെ ചരിത്രത്തെയും സഭാ ശാസ്ത്രത്തെയും ബന്ധപ്പെടുത്തി സംസാരിച്ചു.
അധ്യക്ഷ പ്രസംഗം നടത്തിയ ഇടവക വികാരി ഫാ.ജോസഫ് നെടുമാൻകുഴിയിൽ കേരള ക്രൈസ്തവ സഭയിൽ ഉരുത്തിരിഞ്ഞ വിഘടനത്തിന്റെ ധാർമ്മികതയേയും അതിലൂടെ കേരള സഭ പഠിച്ച പാഠങ്ങളെയും അനുസ്മരിക്കുകയും, നമ്മുടെ പിതാമഹൻമാർ നേടിയെടുത്ത അറിവിന്റെയും സഭാകൂട്ടായ്മയെക്കുറിച്ചുള്ള തീഷ്ണമായ ബോധ്യത്തിന്റെയും പിൻബലത്തിലാണ് ഈ പുനരൈക്യം സാധ്യമാക്കിത്തീർത്തതെന്നു അഭിമാനിക്കുകയും ചെയ്തു. പിളർപ്പിന്റെ വഴിയിൽ നിന്നു യോജിപ്പിന്റെ ശ്രമത്തിലേയ്ക്കു വരാൻ എല്ലാ ക്രൈസ്തവ സഭാ സമൂഹങ്ങൾക്കും സാധിക്കട്ടെ എന്ന് പ്രാർത്ഥിക്കുകയും കൂട്ടായ പരിശ്രമം ആവശ്യമാണെന്നു ഉദ്‌ബോധിപ്പിക്കുകയും ചെയ്തു. ജോർജ് ചെമ്മനാൽ അർപ്പിച്ച കൃതജ്ഞതയോടെ സമ്മേളനം അവസാനിപ്പിച്ചു.