ന്യൂഡല്‍ഹി: ഇന്ത്യന്‍ സൈന്യത്തിന് ഭക്ഷ്യോല്‍പ്പനങ്ങള്‍ വിതരണം ചെയ്യുന്നതില്‍ പ്രധാന പങ്കുവഹിക്കുന്ന പതഞ്ജലി സംശയത്തിന്റെ മുള്‍മുനയില്‍. ഗുണനിലവാരം നിറഞ്ഞ ഉല്‍പ്പനങ്ങള്‍ മാത്രം വിതരണം ചെയ്തിരുന്ന സൈനീക സ്റ്റാളുകളില്‍ വ്യാജ ഉല്‍പ്പനങ്ങള്‍ വില്‍പ്പനക്കെത്തിച്ച ബാബാ രാംദേവിന്റെ പതഞ്ജലി നെല്ലിക്ക ജൂസില്‍ മാരകമായ മായം കലര്‍ന്നെന്ന റിപ്പോര്‍ട്ടുകളാണ് പുതിയ വിവാദത്തിന് തിരിതെളിയിച്ചിരിക്കുന്നത്.
കേന്ദ്ര സര്‍ക്കാര്‍ ഉടമസ്ഥതയിലുള്ള ലബോറട്ടറിയില്‍ നടത്തിയ പരിശോധനയിലാണ് ആരോഗ്യത്തിന് ഹാനികരമായ വസ്തുക്കള്‍ നെല്ലിക്ക ജൂസില്‍ ഉണ്ടെന്ന് വ്യക്തമായത്. മുമ്പ് മാഗി നൂഡില്‍സിനെതിരെയും ഇതേ ലാബിലാണ് പരിശോധന നടന്നതും മാഗിക്ക് നിരോധനം ഉണ്ടായതും. ഇപ്പോള്‍ പതഞ്ജലി ജ്യൂസില്‍ ഹാനികരമായ അംശം ഉണ്ടെന്ന് കണ്ടെത്തിയതിനെ തുടര്‍ന്നു രാജ്യത്തെ സൈനിക കാന്റീനുകളില്‍ നിന്നും ഉല്‍പ്പന്നം പിന്‍വലിച്ചു.
എല്ലാ ഡിപ്പോകളിലും അവശേഷിക്കുന്ന നെല്ലിക്ക ജ്യൂസിന്റെ സ്റ്റോക്ക് വിവരങ്ങള്‍ അറിയിക്കണമെന്നും ഉല്‍പ്പന്നം പിന്‍വലിക്കാനുള്ള നടപടികള്‍ എടുക്കണമെന്നും പ്രതിരോധ വകുപ്പ് കാന്റീന്‍ സ്റ്റോര്‍സ് ഡിപ്പാര്‍ട്ട്‌മെന്റിനോട് നിര്‍ദ്ദേശിച്ചു.
കൊല്‍ക്കത്തയിലെ കേന്ദ്ര ഫുഡ് ലാബിലായിരുന്നു നെല്ലിക്ക ജ്യൂസിന്റെ പരിശോധന. പരിശോധനയില്‍ ജ്യൂസ് ഭക്ഷ്യയോഗ്യമല്ലെന്ന് കണ്ടെത്തിയതായി പേരു വെളിപ്പെടുത്തരുതെന്ന ഉപാധിയോടെ അധികൃതര്‍ മാധ്യമങ്ങളോട് വ്യക്തമാക്കുകയായിരുന്നു. നേരത്തെ നെസ്ലേ കമ്പനിയുടെ മാഗി ന്യൂഡില്‍സില്‍ ഈയവും എംഎസ്ജിയും അനുവദനീയമായതിലും കൂടുതല്‍ കണ്ടെത്തിയതും കൊല്‍ക്കത്തയിലെ ലാബിലെ പരിശോധന ഫലത്തിലാണ്.
സൈന്യത്തിലെ ഭക്ഷണപഥാര്‍ത്ഥങ്ങളില്‍ ആരോഗ്യത്തിന് ഹാനികരമായ പദാര്‍ത്ഥം കലര്‍ത്തുന്നത് കടുത്ത രാജ്യദ്രോഹവും ഗൂഢാലോചനയും ചാരപ്രവര്‍ത്തനവുമാണെന്നാണ് റിപ്പോര്‍ട്ട് പുറത്ത് വന്നയുടെയുള്ള പുതിയ വിവാദങ്ങള്‍. സംഘപരിവാര്‍ ആരാധകനായ ബാബരാംദേവ് സൈന്യത്തിന്റെ മാനസികവും ആരേഗ്യപരവുമായ കാര്യങ്ങളില്‍ ഗൂഢാലോചനപരമായി ഇടപ്പെട്ടുവെന്നുള്ള ആരോപണമാണ് ഇപ്പോള്‍ ഉയരുന്നത്.
Top