മയക്കുമരുന്ന് ഉപയോഗിക്കുന്ന ചിത്രം പുറത്ത്; അശോകൻ ദുബായ് പൊലീസിന്റെ പിടിയിൽ; പൊലീസ് കസ്റ്റഡിയിലെ ഒരു ദിവസം ഓർത്തെടുത്ത് താരം

ദുബായ്: അശോകൻ മയക്കുമരുന്ന് ഉപയോഗിക്കുന്ന ചിത്രങ്ങൾ ദുബായ് പൊലീസിന്റെ കൈവശം ലഭിച്ചു. തുടർന്നു അശോകൻ താമസിക്കുന്ന മുറിയിലെത്തി പൊലീസ് ഇദ്ദേഹത്തെ അറസ്റ്റും ചെയ്തു. പത്മരാജൻ സംവിധാനം ചെയ്ത സീസൺ  എന്ന ചിത്രത്തിന്റെ ഷൂട്ടിംഗ് കഴിഞ്ഞ ശേഷമാണ് അശോകനെ ദുബായ് പൊലീസ് സ്റ്റേഷനിലെത്തിച്ച ആ സംഭവം ഉണ്ടായത്. ഷൂട്ടിംഗിനു ശേഷം ഷാർജയിലേക്കാണ് അശോകൻ പോയത്. ദുബായ് നഗരത്തിന്റെ സൗന്ദര്യം ആവോളം ആസ്വദിച്ച ശേഷം തിരിച്ച് ഹോട്ടൽ മുറിയിലെത്തിയ അശോകനെ കാത്തിരുന്നത് ദുബായ് പൊലീസാണ്.
മയക്കു മരുന്ന് ഒളിപ്പിച്ചു വെച്ചത് എവിടെയാണ് എന്നായിരുന്നു അവർക്ക് അശോകനിൽ നിന്ന് അറിയേണ്ടിയിരുന്നത്. പെട്ടെന്നുള്ള ചോദ്യം ചെയ്യൽ അമ്പരപ്പുണ്ടാക്കിയെങ്കിലും താൻ മയക്കുമരുന്ന് ഉപയോഗിക്കാറില്ലെന്ന് അശോകൻ പൊലീസിനോട് വ്യക്തമാക്കി. യാതൊരു തരത്തിലുള്ള ലഹരി വസ്തുക്കളും ഉപയോഗിക്കാത്തയാളാണ് താനെന്ന് ആവർത്തിച്ച് പറഞ്ഞിട്ടും അശോകനെ പൊലീസ് വിട്ടില്ല.
അശോകന്റെ വാക്കുകൾ വിശ്വസിക്കാൻ പൊലീസ് തയ്യാറല്ലായിരുന്നു. കാരണം അവരുടെ കൈവശം തെളിവായി അശോകൻ മയക്കു മരുന്ന് ഉപയോഗിക്കുന്ന ചിത്രമുണ്ടായിരുന്നു. എന്നാൽ അശോകന്റെ മുറി മുഴുവൻ പരിശോധിച്ചെങ്കിലും പൊലീസിന് മയക്കു മരുന്ന് കണ്ടെത്താനായില്ല. പിന്നീട് അശോകനെ അറസ്റ്റ് ചെയ്ത് സ്‌റ്റേഷനിലേക്ക് കൊണ്ടു പോകുകയാണ് പൊലീസ് ചെയ്തത്.
വിവരമറിഞ്ഞ് അശോകന്റെ സ്‌പോൺസർ എത്തിയെങ്കിലും പൊലീസ് തങ്ങളുടെ നിലപാടിൽ ഉറച്ചു നിന്നു. എന്നാൽ പിന്നീട് പൊലീസിന് വ്യക്തമായി, തെളിവായി കൈവശമുള്ള ചിത്രം അശോകൻ അഭിനയിച്ച സിനിമയിലേതാണെന്ന്. അശോകൻ അഭിനയിച്ച പ്രണാമം എന്ന സിനിമയിലെ രംഗമായിരുന്നു അത്. അശോകനോട് ദേഷ്യമുള്ള ആരോ ചിത്രം പൊലീസിന് കൈമാറുകയായിരുന്നു. തെറ്റ് പറ്റിയെന്ന് മനസിലായ പൊലീസ് അശോകനോട് മാപ്പ് പറഞ്ഞു. അശോകന് അവാർഡ് ലഭിച്ച വാർത്ത അന്നത്തെ പത്രത്തിൽ വന്നതും അശോകന് തുണയായി.
എന്തായാലും ദുബായിലെ പൊലീസ് സ്റ്റേഷനിലെ അനുഭവം മറക്കാൻ കഴിയാത്ത ഒന്നാണെന്നാണ് അശോകൻ പറയുന്നത്. അവാർഡ് നേടിയ വാർത്ത കണ്ട ദുബായ് പൊലീസ് തന്നെ അഭിനന്ദിച്ചുവെന്നും അശോകൻ ഓർക്കുന്നു.