വിവാദ ആൾദൈവം രാധേ മായ്ക്ക് പോലീസ് സ്റ്റേഷനിൽ സ്വീകരണം. ദില്ലി വിവേക് വിഹാർ പോലീസ് സ്റ്റേഷനിലാണ് ഗംഭീര സ്വീകരണം നൽകിയിരിക്കുന്നത്. ഇവർ സ്റ്റേഷനിൽ നിന്ന് മടങ്ങുന്നതുവരെ പോലീസുകാർ ‘രാധേ മാ’ എന്ന് സ്തുതിച്ചുകൊണ്ടിരിക്കുന്നതുമായ വീഡിയോ ഇപ്പോൾ സോഷ്യൽ മീഡിയയിൽ വൈറലായികൊണ്ടിരിക്കുകയാണ്. സ്റ്റേഷൻ ഹൗസ് ഓഫിസർ (എസ്എച്ച്ഒ) എണീറ്റ് തന്റെ കസേരയിൽ രാധേ മായെ ഇരുത്തിയ ചിത്രവും പൊലീസുകാർ ഇവരോടൊപ്പം പാട്ടുപാടുന്നതായും വീഡിയോയിലുണ്ട്. സംഭവം വിവാദമായതോടെ ദില്ലി പോലീസ് അന്വേഷണം ആരംഭിച്ചിരിക്കുകയാണ്. ഹിന്ദു സന്യാസിമാരുടെ പരമോന്നത സംഘടന അഖില ഭാരതീയ അഖാര പരിഷത്തിന്റെ പുതിയ ‘വ്യാജ ആത്മീയ നേതാക്കളുടെ’ പട്ടികയിലുൾപ്പെട്ടയാളാണ് രാധേ മാ. നവരാത്രി ആഘോഷത്തിന്റെ ഭാഗമായി സെപ്റ്റംബർ 28ന് ആണ് രാധേ മാ സ്റ്റേഷനിൽ എത്തിയത്. അതേസമയം നവരാത്രി ചടങ്ങിനെത്തിയ രാധേ മായ്ക്കു ചുറ്റും കൂടിയ ആൾക്കൂട്ടത്തെ നിയന്ത്രിക്കാനായി അവരെ സ്റ്റേഷനിലേക്ക് മാറ്റിയതെന്നാണ് പോലീസിന്റെ വാദം. ബോളിവുഡ് പാട്ടുകള്‍ക്കനുസരിച്ചു നൃത്തം ചെയ്താണ് ആളുകളെ അനുഗ്രഹിക്കുന്നയാളാണ് രാധേ മാ. ബോളിവുഡിലും രാഷ്ട്രീയത്തിലും ഇവർക്ക് നല്ല സ്വധീനം ഉണ്ട്. രാധേ മയെ പോലീസ് സ്റ്റേഷനിൽ സ്വീകരിച്ച ഇരുത്തുന്നതും സ്തുതിപാടുന്നതുമായ വീഡിയോ പുറത്തു വന്നതോടെ സംഭവത്തെ കുറിച്ച് ദില്ലി പോലീസ് അന്വേഷണം ആരംഭിച്ചിട്ടുണ്ട്. പഞ്ചാബിലെ ദൊരന്‍ഗല ഗ്രാമത്തിലെ ഇടത്തരം കുടുംബത്തില്‍ ജനിച്ച രാധേയുടെ യഥാര്‍ഥ പേര് സുഖ്‌വീന്ദര്‍ കൗർ. പതിനേഴാം വയസിൽ വിവാഹിതയായി. ഭർത്താവും കുട്ടികളും ഇവരോടൊപ്പം ആശ്രമത്തിലുണ്ടെന്നാണ് റിപ്പോർട്ടുകൾ.
Top