സ്വന്തം ലേഖകൻ
തിരുവനന്തപുരം: വിവാഹ വീഡിയോയുടെ പ്രമോഷനായി ഒരു ചെറിയ വീഡിയോ നിർമിച്ചപ്പോൾ അത് ഇത്ര ദുരന്തമായി മാറുമെന്നു സീരിയൽ താരം മേഘന കരുതിയതേയില്ല. വീഡിയോയിലെ അഭിനയത്തിന്റെ പേരിൽ സോഷ്യൽ മീഡിയ മേഘനയെ പൊങ്കാലയിട്ട് ആഘോഷിച്ചപ്പോൾ, മറ്റൊരു വിഭാഗം ട്രോളൻമാർ ഈ വീഡിയോ തന്നെ കോ്പ്പിയടിയാണെന്ന് ആരോപണവുമായാണ് രംഗത്ത് എത്തിയിരിക്കുന്നത്.
കല്യാണവീഡിയോയുമെല്ലാം ഒരുക്കിയവരുണ്ടെന്നത് തന്നെ. ഇത്തരത്തിലൊരു വീഡിയോയിൽ നിന്ന് ചൂണ്ടിയതാണ് മേഘ്നയുടെ പ്രമോ വീഡിയോയെന്നും അവർ ആരോപിക്കുന്നു. എങ്കിലും കല്യാണച്ചെക്കന്റെ മർമ്മ സ്ഥാനത്തല്ല ആദ്യവീഡിയോയിൽ പന്ത് കൊള്ളുന്നത് എന്നത് മാത്രമാണ് വ്യത്യാസം.
പ്രമുഖ വീഡിയോഗ്രാഫി ഗ്രൂപ്പായ വിവാ ടീമിന്റെ വീഡിയോയിൽ നിന്ന് മേഘ്നയുടെ വീഡിയോഗ്രാഫർമാർ കോപ്പിയടിച്ചെന്നാണ് ആരോപണം. അനൂപും സിന്ധുവുമായുള്ള വിവാഹത്തിന്റെ സേവ്ഡേറ്റ് വീഡിയോയിലാണ് സമാനമായ ഫുട്ബോൾ കളിയുള്ളത്. 2015 നവംബറിലാണ് വീഡിയോ പുറത്തുവന്നത്. പക്ഷെ മാന്യമായും രസകരമായുമാണ് ഈ വീഡിയോ ചെയ്തതെന്നാണ് കാഴ്ചക്കാർ അഭിപ്രായപ്പെടുന്നത്. മേഘ്നയെ ട്രോളാൻ ഈ പഴയ വീഡിയോ ഉൾപ്പെടെ തപ്പിയെടുത്തിരിക്കുകയാണ് ട്രോളന്മാരിപ്പോൾ. അതേസമയം മേഘ്നയുടെ പ്രീ വെഡിംഗ് വീഡിയോയും യൂട്യൂബിൽ വൈറലാവുകയാണ്. ഈ വീഡിയോയിലും ആട്ടവും പാട്ടുമെല്ലാം കടലിലാണ്. ഈ വീഡിയോയെയും വിടാതെ പിന്തുടരുകയാണ് ട്രോളന്മാർ. രസകരമായ കമന്റ് വായിക്കാനായി മാത്രം വീഡിയോ ലിങ്കിലെത്തുന്നവരും കുറവല്ല. ഇവോക്ക് വെഡിംഗാണ് ഈ മേഘ്നയുടെ വിവാഹവീഡിയോകൾ ഒരുക്കിയത്.
വിവാഹവീഡിയോയുടെ പ്രമോ ഇപ്പോളും യൂട്യൂബിലെ സൂപ്പർഹിറ്റായി ഓടുകയാണ്. ടോപ്പ് ട്രന്റിംഗ് ലിസ്റ്റിലുള്ള വീഡിയോ നാല് ലക്ഷത്തോളമാളുകളാണ് കണ്ടുകഴിഞ്ഞിരിക്കുന്നത്. അഞ്ഞൂറിൽ താഴെ ലൈക്കും, മുപ്പതിനായിരത്തോളം അൺലൈക്കുമുള്ള വീഡിയോ അൺലൈക്കിൽ പുതുചരിത്രം തന്നെ രചിക്കുമെന്ന് ട്രോളന്മാർക്ക് ഉറപ്പുതന്നെ. പേളീ മാണിയുടെയും ജിപിയുടെയും മാങ്ങാത്തൊലിയുമായി ഇഞ്ചോടിഞ്ച് മത്സരത്തിലാണ് ഇപ്പോൾ മേഘ്ന. കയ്യിലൊരു ഫുട്ബോളുമായി മന്ദം മന്ദം നടന്നുവരുന്ന മേഘ്നയുടെ പദചലനങ്ങളുടെ ക്ലോസപ്പിലാണ് വീഡിയോ തുടങ്ങുന്നത്. പിന്നെ പതിയെ ഫുട്ബോൾ നിലത്തുവയ്ക്കുമ്പോൾ ഗോൾ തടുക്കാൻ തയാറായി നിൽക്കുന്ന മേഘ്നയുടെ വരനേയും കാണാം. പിന്നെ ഗോളാക്കാനൊരുങ്ങുന്ന മേഘ്നയുടെ ബോൾ അതിസാഹസികമായി തടഞ്ഞിട്ട് പണി വാങ്ങുന്ന ഡോൺ ടോമിന്റെ ‘ഭാവാഭിനയം’. പിന്നീട് നവ ദമ്പതികളുടെ മന്ദം മന്ദമുള്ള നയനസുന്ദരമായ ഓട്ടം.
ഇത്രയും കണ്ട് അന്ധാളിച്ചാണ് കമന്റിൽ ഓരോരുത്തരും അവനവന്റെ മനസിൽ വിരിഞ്ഞ ഭാവനാ സമൃദ്ധമായ കമന്റുകളുംകൂടി എഴുതി തകർക്കുന്നത്. ഫുട്ബോൾ ഗോളാകാതെ തടയാൻ ‘ഏതറ്റം’ വരെയും പോകുന്ന നവവരനേയും ആളുകൾ ആശംസകൾ കൊണ്ട് മൂടുകയാണ്. വീഡിയോയുടെ താഴെ കമന്റുകളുടെ പ്രളയമാണ്. ”വെറുപ്പിക്കലിന്റെ പല വെർഷൻ കണ്ടിട്ടുണ്ട്… ഇത്ര ഭയാനകമായത് ആദ്യമായി കാണുകയാ” എന്നതാണ് ഒന്നാമത്തെ കമന്റ്. പിന്നാലെ ”എന്റെ ഭാഗത്തും തെറ്റുണ്ട് ..ഈ ലിങ്ക് തുറക്കാൻ പാടില്ലായിരുന്നു” എന്നും ”സുനാമി ഒരു ആവശ്യമുണ്ടാകുമ്പോൾ വരൂല” എന്നും കമന്റുകൾ വന്നിരിക്കുന്നു. ടൈറ്റാനിക്കിന് ശേഷം കടലിനെ ചുറ്റിപ്പറ്റി നടന്ന ഏറ്റവും വലിയ ദുരന്തമെന്നാണ് മറ്റൊരാൾ വീഡിയോയെ വിശേഷിപ്പിച്ചിരിക്കുന്നത്.
നേരത്തെ അരുവിക്കര ഉപ തെഞ്ഞെടുപ്പിൽ ഒ രാജഗോപാലിനുവേണ്ടി വോട്ടഭ്യർത്ഥിച്ച് എത്തിയ മേഘ്ന അവിടെയും അഭിപ്രായപ്രകടനം നടത്തി മാധ്യമങ്ങളുടെയും പൊതുജനങ്ങളുടെയും ശ്രദ്ധയാകർഷിച്ചിരുന്നു. വിദേശരാജ്യങ്ങളായ ചെന്നൈ, ബാംഗ്ലൂർ എന്നൊക്കെ തട്ടിവിട്ടാണ് ഇവർ ‘ഒടുക്കത്തെ’ ട്രോൾ വാരിക്കൂട്ടിയത്. അതിനുശേഷം അഭിനയത്തിൽ മാത്രം ശ്രദ്ധ പതിപ്പിച്ചിരുന്ന മേഘ്നയുടെ വിവാഹ നിശ്ചയം കഴിഞ്ഞ വാലന്റൈൻസ് ദിനത്തിലായിരുന്നു.
നടി ഡിമ്പിൾ റോസിന്റെ സഹോദരനാണ് ഡോം ടോം. പ്രണയദിനത്തിലാണ് ഉറപ്പിക്കൽ നടന്നതെങ്കിലും ഇതൊരു പ്രണയ വിവാഹമല്ല എന്നതാണ് സത്യം . വീട്ടുകാർ ആലോചിച്ച് ഉറപ്പിച്ച വിവാഹമാണിവരുടേത്. ഒരു സ്വകാര്യ കമ്പനി സി.ഇ.ഒയായ ഡോൺ ഉറപ്പിക്കൽ ചടങ്ങിന് എത്തിയതുതന്നെ തന്റെ പ്രിയതമയ്ക്കായി വാലന്റൈൻ ഗിഫ്റ്റുകളുമായിട്ടായിരുന്നു. കലാപാരമ്പര്യമുള്ള കുടുംബത്തിൽനിന്നാണ് തൃശൂർ സ്വദേശിയായ ഡോണും വരുന്നത്. അതുകൊണ്ടുതന്നെ അങ്ങനെയൊരു കുടുംബത്തിൽ മരുമകളായി പോകുന്നതിൽ സന്തോഷമേയുള്ളൂവെന്നാണ് മേഘ്ന പറയുന്നത്. മേഘ്നയും ഡിമ്പിളും ബാലതാരങ്ങളായാണ് അഭിനയരംഗത്തെത്തിയത്. രണ്ടുപേരും സീരിയലിൽ സജീവ സാന്നിധ്യമാണ്. എന്തായാലും ഈ വിവാഹം നവമാധ്യമലോകത്ത് പുതിയ ചരിത്രമാണ് രചിച്ചിരിക്കുന്നത്
Top