ചെന്നൈ: തമിഴ് സിനിമ സീരിയല്‍ താരം ശെല്‍വകുമാര്‍ വാഹനാപകടത്തില്‍(59) മരിച്ചു. ചെന്നൈ ടി നഗറില്‍ വെള്ളിയാഴ്ച രാത്രിയോടെയാണ് അപകടം നടന്നത്. ശെല്‍വകുമാര്‍ സഞ്ചരിച്ചിരുന്ന ബൈക്കിന്റെ സ്പീഡോമീറ്റര്‍ വയര്‍ വീലില്‍ കുടുങ്ങിയാണ് അപകടം ഉണ്ടായത്. ഒരു പരിപാടി കഴിഞ്ഞ് വീട്ടിലേക്ക് മടങ്ങുന്നതിനിടെയായിരുന്നു അപകടം.
വീഴ്ചയുടെ ആഘാതത്തില്‍ തലക്ക് ഗുരുതരമായി പരുക്കേറ്റ ശെല്‍വകുമാര്‍ അപകടസ്ഥലത്ത് വെച്ച് തന്നെ മരിച്ചു. ശെല്‍വകുമാര്‍ ഹെല്‍മറ്റ് ധരിച്ചിട്ടില്ലായിരുന്നുവെന്ന് പൊലീസ് പറഞ്ഞു. ഒപ്പമുണ്ടായിരുന്ന സുഹൃത്തും നടനുമായ കോവൈ സെന്തിലിനെ ഗുരുതര പരുക്കുകളോടെ അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചു.
ഏകദേശം മുന്നൂറോളം ചിത്രങ്ങളില്‍ ശെല്‍വകുമാര്‍ വേഷമിട്ടു. നിരവധി തമിഴ് സീരിയലുകളിലും അഭിനയിച്ചിട്ടുണ്ട്. വിജയകാന്ത് ചിത്രം രാമണ്ണ, വിക്രം നായകനായ അന്യന്‍ എന്നിവയാണ് ശെല്‍വകുമാര്‍ അഭിനയിച്ച ശ്രദ്ധേയമായ ചിത്രങ്ങള്‍. ഗീതയാണ് ശെല്‍വകുമാറിന്റെ ഭാര്യ. രണ്ട് പെണ്‍മക്കളുണ്ട്.
Top