മയക്കുമരുന്നു കച്ചവടം, ആയുധക്കടത്ത് തട്ടിക്കൊണ്ടു പോയി വിലപേശൽ; കോടികൾ കയ്യിലിട്ട് അമ്മാനമായി താലിബാൻ; ലോകത്തിനും ഇന്ത്യയ്ക്കും ഭീഷണിയായി താലിബാൻ വളരുന്നു

കാബൂൾ: അഫ്ഗാനിസ്ഥാനിൽ അതിക്രമിച്ചു കയറിയ താലിബാൻ സംഘം ഭരണം പിടിച്ചതോടെ ഇന്ത്യ അടക്കമുള്ള രാജ്യങ്ങൾ നേരിടുന്നത് വൻ ഭീഷണി. ചൈനീസ് സഹായത്തോടെ വലിയ തോതിൽ അത്യാധുനികമായ ആയുധങ്ങൾ എത്തിച്ചാണ് ഇപ്പോൾ താലിബാൻ രാജ്യത്ത് യുദ്ധത്തിന് ഇറങ്ങിയിരിക്കുന്നത്. ഇതോടെ താലിബാനെ എതിർക്കുന്ന അയൽരാജ്യങ്ങളിൽ ഏറ്റവും പ്രധാനപ്പെട്ടതായ ഇന്ത്യയ്ക്ക് വലിയ ഭീഷണിയാണ് ഇത് ഉയർത്തുന്നത്.

2021ൽ താലിബാൻ 1990കളുടെ അവസാനത്തെ ടെലിവിഷൻ വാർത്താ ദൃശ്യങ്ങളിൽ നിന്നും ഏറെ വ്യത്യസ്ഥമായാണ് കാണപ്പെടുന്നത്. ടെലിക്കാസ്റ്റിന്റെ ഗുണ നിലവാരം മെച്ചപ്പെട്ടു എന്നതിൽ സംശയമില്ല, പക്ഷേ ഭീകരർ കൈയിലെ ആയുധങ്ങളിലടക്കം ഏറെ പുരോഗമിച്ചു എന്ന് പറയേണ്ടിവരും. അവരുടെ ആയുധങ്ങളും വാഹനങ്ങളും ധരിക്കുന്ന വസ്ത്രങ്ങളും അടക്കം മികച്ചതും പുതിയതുമായി കാണപ്പെടുന്നു. അഫ്ഗാനിസ്ഥാനിൽ ഭരണം ഉറപ്പിക്കാനും തങ്ങളുടെ നിയമങ്ങൾ ജനങ്ങളിൽ അടിച്ചേൽപ്പിക്കാനും കരുതലോടെ നീങ്ങുന്ന ഭീകരർക്ക് കരുത്ത് പകരുന്ന ഒരു ഘടകം അവരുടെ സാമ്പത്തിക അടിത്തറയാണ് എന്നത് വ്യക്തമാണ്.

2016ൽ ഫോബ്‌സ് പ്രസിദ്ധീകരിച്ച 10 സമ്പന്ന തീവ്രവാദ സംഘടനകളിൽ അഞ്ചാം സ്ഥാനത്തായിരുന്നു താലിബാൻ. ഒന്നാം സ്ഥാനത്തുളള ഐസിസിന് രണ്ട് ബില്യൺ യു.എസ് ഡോളർ വിറ്റുവരവുണ്ടായിരുന്നു. അതേസമയം, താലിബാന്റെ വാർഷിക വിറ്റുവരവ് 400 മില്യൺ ഡോളറായിരുന്നു. മയക്കുമരുന്ന് കച്ചവടം, സംരക്ഷണ പണം, സംഭാവനകൾ എന്നിവയാണ് താലിബാന്റെ പ്രാഥമിക വരുമാന സ്രോതസുകൾ. ഫോർബ്‌സ് പട്ടികപ്പെടുത്തി തയ്യാറാക്കിയ 2016ൽ അഫ്ഗാനിസ്ഥാനിൽ പോലും താലിബാൻ ഒരു പ്രബല ശക്തിയായിരുന്നില്ല എന്നോർക്കണം. റേഡിയോ ഫ്രീ യൂറോപ്പ്/റേഡിയോ ലിബർട്ടി ആക്‌സസ് ചെയ്ത ഒരു നാറ്റോ രഹസ്യ റിപ്പോർട്ട് അനുസരിച്ച്, 2019-20 സാമ്പത്തിക വർഷത്തിൽ താലിബാന്റെ വാർഷിക ബജറ്റ് 1.6 ബില്യൺ ഡോളറാണ്. 2016 ലെ ഫോർബ്‌സ് കണക്കുകളുമായി താരതമ്യം ചെയ്യുമ്പോൾ നാല് വർഷത്തിനുള്ളിൽ വൻ വർദ്ധനവാണ് ഉണ്ടായിരിക്കുന്നത്.

ഈ റിപ്പോർട്ട് അനുസരിച്ച് താലിബാന്റെ വരുമാനം വിവിധ വിഭാഗങ്ങളിലായി തരംതിരിച്ച് നൽകിയിട്ടുണ്ട്. ഇതനുസരിച്ച് ഖനനത്തിലൂടെ 464 മില്യൺ ഡോളറാണ് ഈ ഭീകര സംഘടന സ്വരൂപിച്ചത്. മയക്കുമരുന്ന് കച്ചവടം – 416 മില്യൺ, വിദേശ സംഭാവന – 240 മില്യൺ, കയറ്റുമതി – 240 മില്യൺ, നികുതി (സംരക്ഷണം/അന്യായമായി ഈടാക്കുന്ന പണം) – 160 മില്യൺ, റിയൽ എസ്റ്റേറ്റ് – 80 മില്യൺ ഡോളർ എന്നിങ്ങനെയാണ് മറ്റു കണക്കുകൾ. ഒരു സ്വതന്ത്ര രാഷ്ട്രീയ-സൈനിക സ്ഥാപനമായി മാറുന്നതിന് താലിബാൻ നേതൃത്വം സ്വയംപര്യാപ്തത പിന്തുടരുന്നുവെന്ന വസ്തുതയും നാറ്റോയുടെ രഹസ്യ റിപ്പോർട്ട് ഉയർത്തിക്കാട്ടിയതായും പറയപ്പെടുന്നു.

വർഷങ്ങൾ കഴിയുന്തോറും താലിബാൻ വിദേശ സംഭാവനകളെ ആശ്രയിക്കുന്നത് കുറയ്ക്കുന്നതായി റിപ്പോർട്ടുകൾ പറയുന്നു. 2017-18 ൽ ഏകദേശം 500 മില്യൺ ഡോളർ അല്ലെങ്കിൽ മൊത്തം ഫണ്ടിന്റെ പകുതിയോളം വിദേശ സ്രോതസുകളിൽ നിന്ന് ലഭിച്ചതായി റിപ്പോർട്ടുണ്ട്. ഇത് 2020ഓടെ അവരുടെ മൊത്തം വരുമാനത്തിന്റെ ഏകദേശം 15 ശതമാനമായി കുറഞ്ഞു. അതേ സാമ്പത്തിക വർഷത്തിൽ, അഫ്ഗാനിസ്ഥാൻ സർക്കാരിന്റെ ഔദ്യോഗിക ബജറ്റ് 5.5 ബില്ല്യൺ ഡോളർ ആയിരുന്നു. ഇതിൽ രണ്ട് ശതമാനത്തിൽ താഴെ മാത്രമാണ് പ്രതിരോധത്തിന് വേണ്ടി വകയിരുത്തിയത്. എന്നിരുന്നാലും, അഫ്ഗാനിസ്ഥാനിൽ നിന്ന് താലിബാനെ ഒഴിവാക്കുക എന്ന ലക്ഷ്യത്തിനായി ഭൂരിഭാഗം ചെലവും അമേരിക്ക ഏറ്റെടുത്തു.

സമ്പൂർണ്ണ സാമ്പത്തിക കാഴ്ചപ്പാടിൽ നിന്ന് നോക്കുമ്പോൾ, താലിബാന്റെ നിക്ഷേപത്തിൽ നിന്നുള്ള വരുമാനം അനുദിനം മെച്ചപ്പെടുന്നു. യു.എസ്, നാറ്റോ സേനകളുടെ പിരിച്ചുവിടൽ മൂലമുണ്ടാകുന്ന വിടവ് അവർ വേഗത്തിൽ നികത്തുമ്പോൾ അവർ സ്വയം സന്തോഷിക്കുന്നതിൽ അതിശയിക്കാനില്ല. അവരുടെ സാമ്പത്തിക സ്രോതസുകൾ അഭിവൃദ്ധി പ്രാപിക്കുന്നു. ഉയർന്ന ലാഭത്തിന്റെ സാദ്ധ്യതകൾ താലിബാൻ പ്രയോജനപ്പെടുത്തുമ്പോൾ തോൽവിയുടെ വില നൽകാൻ നിർബന്ധിതരാകുന്നത് അഫ്ഗാനിസ്ഥാൻ ജനതയാണ്.