ഡ്രൈവിംഗ് ടെസ്റ്റും പരിശീലനവും തിങ്കളാഴ്ച മുതൽ ; കോവിഡ് പ്രോട്ടോക്കോൾ പൂർണ്ണമായും പാലിക്കണമെന്ന് കർശനനിർദ്ദേശം

സ്വന്തം ലേഖകൻ

തിരുവനന്തപുരം : സംസ്ഥാനത്ത് ലോക് ഡൗണിന്റെ പശ്ചാത്തലത്തിൽ നിർത്തിവച്ച ഡ്രൈവിംഗ് ടെസ്റ്റുകളും, ഡ്രൈവിംഗ് പരിശീലനവും ജൂലൈ 19 തിങ്കളാഴ്ച്ച മുതൽ പുനരാരംഭിക്കുമെന്ന് ഗതാഗത മന്ത്രി ആന്റണി രാജു അറിയിച്ചു.

കോവിഡ് വൈറസ് വ്യാപനത്തിന്റെ സാഹചര്യം മുൻനിർത്തി കോവിഡ് പ്രോട്ടോകോൾ പൂർണ്ണമായി പാലിച്ചു കൊണ്ടു വേണം ടെസ്റ്റും പരിശീലനവും നടത്തേണ്ടതെന്നും മന്ത്രി അറിയിച്ചു.

പരിശീലന വാഹനത്തിൽ ഇൻസ്ട്രക്ടറെ കൂടാതെ ഒരു സമയം ഒരു പഠിതാവിനെ പ്രവേശിപ്പിക്കാൻ മാത്രമേ അനുവദിക്കുകയുള്ളൂ. ഇതിന് പുറമെ കോവിഡ് മാനദണ്ഡങ്ങൾ പാലിക്കപ്പെടുന്നുവെന്ന് മോട്ടോർ വാഹനവകുപ്പ് ഉദ്യോഗസ്ഥർ ഉറപ്പു വരുത്തണമെന്നും നിർദ്ദേശമുണ്ട്.