കൊറോണ എന്ന മഹാമാരിയെ പൂര്‍ണമായി തുടച്ചുമാറ്റുക എന്നത് അസാധ്യമായ കാര്യമാണെന്ന് പഠനം. ഇന്ത്യയില്‍ വേനല്‍ക്കാലത്ത് കൊറോണയെ അതിജീവിച്ചാലും വരാന്‍ പോകുന്ന ശൈത്യം വൈറസിനെ തിരികെ കൊണ്ടുവരുമെന്നാണ് വിദഗ്ധരുടെ വിലയിരുത്തല്‍. കൊറോണ വൈറസിനെ ഫലപ്രദമായി നേരിടാനും ചികില്‍സയ്ക്കുമുള്ള ഗവേഷണത്തില്‍ ഏര്‍പ്പെട്ടിരിക്കുന്ന വിദഗ്ധരാണ് ഈ നിരീക്ഷണം നടത്തിയത്. സാര്‍സിനും മെര്‍സിനും ശേഷം ഏറ്റവുമധികം പേരെ ബാധിക്കുന്ന വൈറസാവും സാര്‍സ്‌കോവ്2 എന്നും അവര്‍ വിശദീകരിക്കുന്നു.
നിലവില്‍ പുതിയ വൈറസിനെ ചെറുക്കാന്‍ മനുഷ്യരില്‍ സ്വാഭാവിക രോഗപ്രതിരോധ ശേഷിയില്ല. രോഗബാധിതരുടെ സ്രവങ്ങളില്‍നിന്നാണ് വൈറസ് പടരുന്നത്. ഏപ്രില്‍, മേയ് മാസത്തെ ചൂടില്‍ ഈ സ്രവങ്ങളിലെ വൈറസ് അധികസമയം നിലനില്‍ക്കില്ലെന്നും വിദഗ്ധര്‍ പറയുന്നു.
അതേസമയം, തെറ്റായ പരാമര്‍ശം നടത്തിയ മുംബൈ സ്വദേശിയായ ഡോക്ടര്‍ക്ക് മെഡിക്കല്‍ കൗണ്‍സിലിന്റെ നോട്ടീസ്. കൊറോണ ‘ചൈനീസ് ഭ്രമം’ ആണെന്നും അത് ഇന്ത്യയിലെ ഈ കാലാവസ്ഥയില്‍ അതിജീവിക്കില്ലെന്നുമായിരുന്നു ഡോക്ടറുടെ പരാമര്‍ശം.മധ്യ മുംബൈയിലെ ദാദര്‍ സ്വദേശിയായ ഡോ. അനില്‍ പട്ടീല്‍ ആണ് പ്രസ്താവന നടത്തിയത്. ഇതുവരെ ഒരു പഠനവും തെളിയിക്കാത്ത ഈ പരാമര്‍ശം നടത്തിയതിന് ഡോക്ടറോട് വിശദീകരണം തേടിയതായി മെഡിക്കല്‍ കൗണ്‍സില്‍ പറയുന്നു. വൈറസുകളെ കുറിച്ചുള്ള അദ്ദേഹത്തിന്റെ അവകാശവാദം തെളിയിക്കുന്ന എന്തെങ്കിലും പഠനങ്ങളോ തെളിവുകളോ ഉണ്ടെങ്കില്‍ ഹാജരാക്കാനും നിര്‍ദേശിച്ചതായി എം.എം.സി പ്രസിഡന്റ് ഡോ. ശിവകുമാര്‍ ഉത്തേകര്‍ പറഞ്ഞു.
ഡോ. അനില്‍ തന്റെ പല അഭിമുഖങ്ങളിലും ഈ അവകാശവാദമുന്നയിച്ചത് കേന്ദ്രസര്‍ക്കാര്‍ നല്‍കിയ മുന്നറിയിപ്പുകള്‍ക്ക് വിരുദ്ധമാണ്. കൊറോണ വൈറസ് തടയാന്‍ കേന്ദ്ര സംസ്ഥാന സര്‍ക്കാരുകള്‍ നല്‍കിയ മാര്‍ഗനിര്‍ദേശത്തിന് എതിരെയാണ് ഡോ.അനില്‍ സംസാരിക്കുന്നത് ഇത് അംഗീകരിക്കാന്‍ കഴിയില്ലെന്നും എം.എം.സി പറയുന്നു.
Top