കണ്ണൂരിൽ ക്രിക്കറ്റ് കളിക്കിടെ ഐസ്‌ക്രീം ബോംബ് പൊട്ടി: ഒരു കുട്ടിക്ക് പരിക്ക്

കണ്ണൂര്‍: കണ്ണൂരിൽ ഐസ്‌ക്രീം ബോംബ് പൊട്ടി കുട്ടിക്ക് പരിക്ക്. നരിവയല്‍ സ്വദേശി ശ്രീവര്‍ധനാണ് പരിക്കേറ്റത്. കുട്ടികള്‍ ക്രിക്കറ്റ് കളിക്കുന്നതിനിടയിലായിരുന്നു സംഭവം.കുട്ടിയുടെ പരിക്ക് ​ഗുരുതരമല്ല. പോലീസ് സ്ഥലത്തെത്തി പരിശോധന ആരംഭിച്ചിട്ടുണ്ട്.

കളിക്കുന്നതിനിടെ പന്ത് ഗ്രൗണ്ടിന് തൊട്ടടുത്തുള്ള കാടുപിടിച്ച പറമ്പിലേക്ക് പോയപ്പോള്‍ കുട്ടികള്‍ അതെടുക്കാന്‍ പോകുകയായിരുന്നു. പറമ്പിന്റെ മതിലിന് അരികിലുണ്ടായിരുന്ന ബോള്‍ രൂപത്തിലുള്ള ഐസ്‌ക്രീം കപ്പുകള്‍ കുട്ടികളുടെ ശ്രദ്ധയില്‍പെട്ടു. ശ്രീവര്‍ധന്‍ ഇത് എടുക്കുകയും സംശയം തോന്നിയതോടെ വലിച്ചെറിയുകയും ചെയ്തു. ആ സമയത്താണ് ബോംബ് പൊട്ടിയതെന്നാണ് പ്രാഥമിക വിവരം.