തിരുവനന്തപുരം: ഒരാണും പെണ്ണും പരസ്പരം കെട്ടിപ്പിടിച്ചാല്‍ ഇടിഞ്ഞു വീഴുന്നതാണ് സദാചാരമെന്ന് ചിന്തിക്കുന്നവര്‍ക്കുള്ള മറുപടിയുമായി എഴുത്തുകാരി ശാരദക്കുട്ടി. തിരുവനന്തപുരം മുക്കോല സെന്റ് തോമസ് സെന്‍ട്രല്‍ സ്‌കൂളില്‍ നടന്ന ഒരു നിസാര പ്രശ്‌നം കടല്‍ കടന്ന് ബി.ബി.സിയില്‍ വരെ വാര്‍ത്തയായപ്പോള്‍ കേരളം മുഴുവന്‍ സദാചാരത്തെപ്പറ്റിയുള്ള ചര്‍ച്ചകളില്‍ മുങ്ങി.
എന്നാല്‍ സ്‌കൂള്‍ വിദ്യാര്‍ത്ഥികള്‍ തമ്മിലുള്ള പ്രണയവും സ്‌നേഹ പ്രകടനവും പണ്ട് കാലത്തും ഉണ്ടായിട്ടുണ്ടെന്നും താന്‍ അതിന് സാക്ഷിയായിട്ടുണ്ടെന്നും തുറന്നെഴുതിയ എഴുത്തുകാരി ശാരദകുട്ടി ടീച്ചറുടെ ഫെയ്‌സ്ബുക്ക് പോസ്റ്റാണ് ഇപ്പോള്‍ വൈറലാകുന്നത്. സാന്ദര്‍ഭികമായി സംഭവിച്ചുപോയ ഒരു സ്‌നേഹപ്രകടനത്തിന്റെ പേരില്‍ നിരപരാധികളായ രണ്ട് കുട്ടികളെ ക്രൂശിക്കുന്നവരുടെ ഭൂതകാലത്തെയും ടീച്ചര്‍ കണക്കിന് വിമര്‍ശിക്കുന്നുണ്ട്.
പോസ്റ്റിന്റെ പൂര്‍ണരൂപം:
മൂത്രപ്പുരയുടെ പിന്നില്‍ വെച്ച് ഹൈസ്‌കൂളിലെ ഒരു ചേച്ചിയും ചേട്ടനും കെട്ടിപ്പിടിച്ചു നില്‍ക്കുന്നത് ഞാന്‍ കണ്ടിട്ടുണ്ട്. ഓടിപ്പോയ എന്നെ വിളിച്ച് ആരോടും പറയാതിരുന്നാല്‍ സ്‌പോ്ര്ട്‌സ് ഡേക്ക് ഐസ് സ്റ്റിക് വാങ്ങിത്തരാമെന്നു പറഞ്ഞു. ഞങ്ങളൊക്കെ പഠിക്കുന്ന കാലത്തും സ്‌ക്കൂളില്‍ പ്രണയമുണ്ടായിരുന്നു. തൂണിന്റെ മറവിലും മരത്തിന്റെ ചുവട്ടിലും മൂത്രപ്പുരയുടെ പിന്നിലും കിണറ്റുകരയിലും ഒക്കെ രഹസ്യമായും പരസ്യമായും പ്രണയിച്ചിരുന്നവര്‍.
സ്‌പോര്‍ട്ട്‌സ് ദിവസങ്ങളില്‍ ആണ് രസം. സീനിയര്‍ ചേച്ചിമാര്‍ ചേട്ടന്മാര്‍ക്കു കൊടുക്കാന്‍ എഴുതിത്തന്നു വിട്ടിരുന്ന കുറിപ്പുകള്‍ കൃത്യവിലോപമില്ലാതെ എത്തിച്ചിരുന്നതിനു പകരമായി എത്ര തവണ ഐസ്സ്റ്റിക് വാങ്ങിക്കഴിച്ചിട്ടുണ്ട്. അവരുടെയൊക്കെ മക്കളോ കൊച്ചുമക്കളോ ആണ് യൂണിഫോമില്‍ ഞെരുങ്ങി ,ചൂരലില്‍ കുരുങ്ങി സൈനിക റെജിമെന്റുകളിലെന്നതു പോലെ വൈകാരികമായി വന്ധ്യംകരിക്കപ്പെട്ടു കഴിഞ്ഞു കൂടുന്നത്.
സ്‌കൂളിലെ നിത്യകാമുകിയായിരുന്ന ഒരു ചേച്ചി, കുട്ടികള്‍ക്കു സ്വാതന്ത്ര്യത്തിനു വേണ്ടി വാദിക്കുന്നവരെ പരിഹസിച്ചും നിന്ദിച്ചും കഴിഞ്ഞ ദിവസം ഒരിടത്തു പ്രസംഗവും കൗണ്‍സിലിങ് ക്ലാസും നടത്തുന്നതു കണ്ടപ്പോള്‍ ഓര്‍ത്തു പോയതാണ്.. ചേച്ചി റിട്ടയര്‍ഡ് ഹെഡ്മിസ്ട്രസാണ്. ചേച്ചീ, ആദ്യ ഐസ് ക്രീം എനിക്കു വാഗ്ദാനം ചെയ്ത ആ മൂത്രപ്പുരയുടെ സുഗന്ധം മറന്നു പോയതെങ്ങനെ?.. എന്റെ 12 വയസ്സില്‍ അന്നു നിങ്ങളെ കണ്ടപ്പോഴുണ്ടായ ആ കുളിര് എന്റെ ദേഹത്തു നിന്നിപ്പോഴും മാറിയിട്ടില്ലല്ലോ.
Top