കൊച്ചി: ബിനീഷ് കോടിയേരിയെ എൻഫോഴ്സ്മെന്റ് ചോദ്യം ചെയ്യും .സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ ബിനീഷ് കോടിയേരിയോട് എൻഫോഴ്സ്മെന്റിന് മുന്നിൽ ഹാജരാകാൻ നിർദ്ദേശം. സ്വർണ്ണക്കടത്ത് കേസും മയക്കുമരുന്ന് കേസും തമ്മിലുള്ള ബന്ധം അറിയാനാണ് ചോദ്യം ചെയ്യൽ. മയക്കുമരുന്ന് കേസിലെ പണം സ്വർണക്കടത്തിൽ നിക്ഷേപിച്ചതായും സൂചനയുണ്ട്. സ്വർണ്ണക്കടത്ത് കേസിലെ പ്രതി റമീസുമായി ബിനീഷിന് ബന്ധമുള്ളതായി എൻഫോഴ്സ്മെന്റിന് വിവരം ലഭിച്ചിട്ടുണ്ട്.
ബംഗളൂരു മയക്കുമരുന്ന് കേസിലെ പ്രതി അനൂപ് മുഹമ്മദിനെ ചോദ്യം ചെയ്തപ്പോഴാണ് ബിനീഷ് കോടിയേരിക്ക് ഇയാളുമായുള്ള ബന്ധം പുറത്തുവന്നത്. അനൂപിനെ അറസ്റ്റ് ചെയ്യുന്നതിന് മുൻപ് പല പ്രാവശ്യം ബിനീഷ് കോടിയേരിയെ വിളിച്ചിരുന്നതായി ഫോൺകോൾ വിവരങ്ങളും പുറത്തു വന്നിരുന്നു. എന്നാൽ അനൂപ് മുഹമ്മദുമായി സൗഹൃദം മാത്രമേയുള്ളൂ എന്നാണ് ബിനീഷ് സ്വീകരിച്ച നിലപാട്. ലോക്ക്ഡൗൺ കാലത്ത് അനൂപിന് 15000 രൂപ സാമ്പത്തിക സഹായം നൽകുകയും ചെയ്തിരുന്നെന്ന് ബിനീഷ് വ്യക്തമാക്കിയിരുന്നു.എന്നാൽ, അനൂപിനെ ചോദ്യം ചെയ്തപ്പോൾ മലയാള സിനിമാ മേഖലയുമായി ബന്ധമുള്ള ചിലരുടെ വിവരങ്ങളും നർകോടിക് വിഭാഗത്തിന് ലഭിച്ചിരുന്നു. ബിനീഷാണ് ഇവരെ പരിചയപ്പെടുത്തിയത് എന്നാണ് മുഹമ്മദ് ചോദ്യം ചെയ്യലിൽ വ്യക്തമാക്കിയത്.
Top