കൊച്ചി:സോളാറിൽ കോളടിച്ചത് രമേശ് ചെന്നിത്തലക്ക് !..സോളാര്‍ റിപ്പോര്‍ട്ടില്‍ ഗോളടിച്ചത് പിണറായി ആണെങ്കിലും കോളടിച്ചത് രമേശ് ചെന്നിത്തലയ്ക്കാണെന്നാണ് രാഷ്ട്രീയ നിരീക്ഷകന്‍ എ ജയശങ്കര്‍. മനപ്പൂര്‍വ്വമല്ലെങ്കിലും പിണറായി ബിജെപിക്ക് വലിയ സഹായമാണ് ചെയ്തിട്ടുള്ളതെന്നും അദ്ദേഹം അഭിപ്രായപ്പെട്ടു.
ജയശങ്കറിന്റെ ഫെയ്‌സ്ബുക്ക് പോസ്റ്റിന്റെ പൂര്‍ണരൂപം…
സോളാർ റിപ്പോർട്ടിൽ ഗോളടിച്ചത് പിണറായി ആണെങ്കിലും കോളടിച്ചത് ചെന്നിത്തലയ്ക്കാണ്: ഉമ്മൻചാണ്ടിയും തിരുവഞ്ചൂരും ഒതുങ്ങി, ബെന്നി ബഹനാനും കെ.സി.വേണുഗോപാലും ഷെഡ്ഡിൽ കയറി. കെപിസിസി പ്രസിഡന്റായി ഇനി ആരു വന്നാലും രമേശിനു പുല്ലാണ്.
പിണറായി സഖാവ് മന:പൂർവമല്ലെങ്കിൽപ്പോലും ബിജെപിക്കു വലിയ സഹായമാണ് ചെയ്തിട്ടുളളത്. അമിത്ഷായുടെ മകൻ അമിതമായി പണമുണ്ടാക്കി എന്ന ആരോപണത്തിൽ പിടിച്ചു രാഹുൽഗാന്ധി ആക്രമണം കടുപ്പിക്കുമ്പോഴാണ് സോളാർ സ്റ്റ്രോക്ക് ഉണ്ടായത്. ജസ്റ്റിസ് ശിവരാജൻ്റെ റിപ്പോർട്ട് പൊക്കിപ്പിടിച്ചാവും ഗുജറാത്തിൽ മോദി പ്രചരണം നടത്തുക. അഴിമതിക്കു മാത്രമല്ല സ്ത്രീപീഡനത്തിനും രാഹുൽ ന്യായം പറയേണ്ടിവരും.
ഇല്ലാത്ത ചാരക്കേസുണ്ടാക്കി കരുണാകരനെ താഴെയിറക്കിയവരാണ് കോൺഗ്രസിലെ A ഗ്രൂപ്പുകാർ. കാലം കണക്കു തീർക്കുന്നത് ലീഡർ പരലോകത്തിരുന്ന് കാണുന്നുണ്ടാകും.
അടിക്കുറിപ്പ്:
സരിതയെ പേടിപ്പിച്ചവരുടെയും പീഡിപ്പിച്ചവരുടെയും പണം പിടുങ്ങിയവരുടെയും പട്ടികയിൽ മുൻ മദ്യമന്ത്രി കെ.ബാബുവിൻ്റെ പേരില്ല. കേബു ആളു ഡീസൻ്റാണ്, ബാക്കി കോൺഗ്രസുകാരെ പോലെയല്ല.
Top