യതീഷ് ചന്ദ്ര കണ്ണൂർ എസ് പി.അഞ്ച് ജില്ലാ പോലീസ് മേധാവിമാർക്ക് മാറ്റം., അനൂപ് കുരുവിള ജോൺ എടിഎസ് തലവൻ.

തിരുവന്തപുരം: പോലീസിൽ വീണ്ടും അഴിച്ചുപണി . വിവിധ ജില്ലാ പോലീസ് മേധാവിമാർ അടക്കമുള്ളവരെയും സ്ഥലംമാറ്റിയാണ് അഴിച്ചുപണി നടത്തിയിരിക്കുന്നത്. തൃശൂർ ജില്ലാ പോലീസ് മേധാവിയായിരുന്ന യതീഷ് ചന്ദ്രയെ കണ്ണൂർ ജില്ലാ പൊലീസ് മേധാവിയാക്കി നിയമിച്ചു. പകരം കണ്ണൂർ ജില്ലാ പൊലീസ് മേധാവിയായിരുന്ന പ്രതീഷ് കുമാറിനെ പൊലീസ് ആസ്ഥാനത്ത് എസ്പിയായി നിയമിച്ചു.

പോലീസ് അക്കാദമിയുടെ ചുമതലയുണ്ടായിരുന്ന ഡിഐജി അനൂപ് കുരുവിള ജോണിനെ ഭീകരവിരുദ്ധ സ്ക്വാഡിന്റെ തലവനായി നിയമിച്ചു. പകരം ഡിഐജി നീരജ് കുമാർ ഗുപ്തയെ പോലീസ് അക്കാദമിയിൽ നിയമിച്ചു.

കൊല്ലം എസ്പിയായിരുന്ന പികെ മധുവിനെ ഇടുക്കി ജില്ലാ പോലീസ് മേധാവിയായും ഇടുക്കി എസ്പിയായിരുന്ന ടി നാരായണനെ കൊല്ലം എസ്പിയായും തിരുവനന്തപുരം ഡിസിപി ആർ ആദിത്യയെ തൃശ്ശൂർ ജില്ലാ പോലീസ് മേധാവിയായും ഇടുക്കി ക്രൈംബ്രാഞ്ച് എസ്പി സക്കറിയ ജോർജിനെ വനിതാ സെൽ എസ്പിയായും വയനാട് എസ്പി കറുപ്പസ്വാമിയെ തിരുവനന്തപുരം ഡെപ്യൂട്ടി കമ്മീഷണറായും നിയമിച്ചു.കണ്‍സ്യൂമ‌ർ ഫെഡ് എംഡി ആർ സുകേശൻ പുതിയ സ്പെഷ്യൽ ബ്രാഞ്ച് എസ്‍പിയാകും. പകരം എറണാകുളം ക്രൈംബ്രാഞ്ച് എസ്പി വി എം മുഹമ്മദ് റഫീക്കിനെ കണ്‍സ്യൂമ‌ർ ഫെഡ് എംഡിയായും നിയമിച്ചു.