തിരുവനന്തപുരം: സംസ്ഥാനത്ത് ഡെങ്കിപ്പനിയും എച്ച്1എന്1 പനിയും പടരുന്നു. ഈ മാസം മാത്രം സംസ്ഥാനത്ത് അഞ്ഞൂറിലധികം പേരിലാണ് ഡെങ്കി സ്ഥിരീകരിച്ചത്. ഈ വര്ഷം ഇതുവരെ 18 പേര് എച്ച് 1 എന് 1 ബാധിച്ച് മരിച്ചു. ഏപ്രിലില് മാത്രം 68 പേരെയാണ് എച്ച് 1 എന് 1 ബാധിച്ച് ആശുപത്രിയില് പ്രവേശിപ്പിച്ചത്.
കഴിഞ്ഞദിവസം റിപ്പോര്ട്ട് ചെയ്യപ്പെട്ട 66 ഡെങ്കിബാധിതരില് 54ഉം തിരുവനന്തപുരം ജില്ലയിലാണ്. തൊട്ടുമുമ്പത്തെ ദിവസവും 52 ഡെങ്കിപ്പനി കേസുകള് തിരുവനന്തപുരത്ത് റിപ്പോര്ട്ട് ചെയ്തു. ഇടവിട്ടുള്ള മഴയില് കൊതുകുപെരുകുന്നതിന് കാരണം.
ജനുവരിക്കും മാര്ച്ചിനുമിടയില് 1200 പേര്ക്ക് ഡെങ്കിപ്പനിയും 12 പേര്ക്ക് ചിക്കുന്ഗുനിയയും ബാധിച്ചു. 280 പേര്ക്കാണ് എലിപ്പനി ബാധിച്ചത്. നാലുപേര് മരിച്ചു. ഈ മാസം ഇതുവരെ 61 കേസുകള് റിപ്പോര്ട്ട് ചെയ്തിട്ടുണ്ട്. കൊല്ലം ജില്ലയാണ് ഡെങ്കിപ്പനിയില് തിരുവനന്തപുരത്തിന് തൊട്ടുപിന്നില്. കഴിഞ്ഞമൂന്നുമാസത്തിനിടെ ജില്ലയില് രോഗം ബാധിച്ചത് 109 പേര്ക്ക്.
കടുത്ത പനിക്കൊപ്പം ശരീരവേദന, തലവേദന, ശരീരത്ത് ചുവന്ന പാടുകള് തുടങ്ങിയവ ഡെങ്കിയുടെ ലക്ഷണമാണ്. വൈറസ് രോഗമായ എച്ച് 1 എന് 1 തുമ്മലിലൂടെയും ചുമയിലൂടെയും മറ്റുമാണ് പകരുന്നത്. ജലദോഷപ്പനി, ചുമ, തൊണ്ടവേദന, ശ്വാസംമുട്ടല് തുടങ്ങിയ രോഗലക്ഷണങ്ങള് നീണ്ടുനില്ക്കുകയാണെങ്കില് ഉടന് ഡോക്ടറുടെ സഹായം തേടണം. സാധാരണ വൈറല് പനി ഭേദമാകാന് മൂന്നുമുതല് അഞ്ചുദിവസംവരെ വേണ്ടിവരും. ഡെങ്കി, എച്ച് 1 എന് 1 തുടങ്ങിയക്കെതിരേ ആരോഗ്യവകുപ്പ് എല്ലാ മുന്കരുതലുകളും എടുത്തിട്ടുണ്ടെന്നും ആവശ്യമായ മരുന്ന് സര്ക്കാര് ആസ്?പത്രികളില് ലഭ്യമാക്കിയിട്ടുണ്ടെന്നും ആരോഗ്യവകുപ്പ് ഡയറക്ടര് ഡോ. ആര്.എല്. സരിത അറിയിച്ചു.