മെക്സിക്കോ സിറ്റി: ലോകകപ്പില് ട്യുണീഷ്യയെ എതിരില്ലാത്ത നാല് ഗോളുകള്ക്ക് തകര്ത്തുവിട്ട് ജപ്പാന്. തുടക്കംമുതല് ഒടുക്കംവരെ പന്തടക്കത്തിലും വേഗത്തിലും ജപ്പാന് കാട്ടിയ ആധിപത്യത്തിന് മുന്നില് ട്യുണീഷ്യന് പ്രതിരോധം പൂര്ണമായി തകരുകയായിരുന്നു. ആദ്യ പകുതിയില് രണ്ട് ഗോളുകള് നേടി മത്സരത്തിന്റെ നിയന്ത്രണം ഏറ്റെടുത്ത ജപ്പാന്, രണ്ടാം പകുതിയിലും രണ്ട് ഗോളുകള് കൂടി സ്കോര് ചെയ്തു.
മത്സരം തുടങ്ങി നാലാം മിനിറ്റില് തന്നെ ജപ്പാന് ലീഡെടുത്തു. ഇടതുവിങ്ങിലൂടെ കുതിച്ചുപാഞ്ഞ നകാമുറ നല്കിയ മികച്ചൊരു ക്രോസ് കൃത്യമായി ബോക്സിലെത്തിയ ഡെയ്ച്ചി കാമഡ വലയിലാക്കുകയായിരുന്നു (10). തൊട്ടുപിന്നാലെ രണ്ട് അവസരങ്ങള് ജപ്പാന് വീണ്ടും ലഭിച്ചെങ്കിലും ട്യുണീഷ്യന് പ്രതിരോധത്തിന്റെ കഠിനശ്രമങ്ങളും ഗോള്കീപ്പര് ദഹ്മന്റെ മികച്ച സേവുകളും അവരെ രക്ഷിച്ചു. കോച്ച് ഹാജിമെ മൊറിയാസുവിന്റെ 3-4-3 ഫോര്മേഷനില് ജപ്പാന് താരങ്ങള് കളം നിറഞ്ഞു കളിച്ചതോടെ ട്യുണീഷ്യന് നിര ശരിക്കും കാഴ്ചക്കാരായി മാറി.
31-ആം മിനിറ്റില് ഫെയ്നൂര്ഡ് സ്ട്രൈക്കര് അയസെ ഉവേദയിലൂടെ ജപ്പാന് തങ്ങളുടെ രണ്ടാം ഗോള് നേടി. ബോക്സിന്റെ വലതുമൂലയിലേക്ക് പന്തുമായി മുന്നേറിയ ഉവേദ, ട്യുണീഷ്യന് ഡിഫെന്ഡര് താല്ബിയുടെ കാലുകള്ക്കിടയിലൂടെ തൊടുത്ത ലോ-ഡ്രൈവ് വലയില് തുളച്ചുകയറി (20).
രണ്ടാം പകുതിയില് ട്യുണീഷ്യ ചില മാറ്റങ്ങളോടെ പ്രതിരോധം ശക്തമാക്കാന് ശ്രമിച്ചു. 50-ആം മിനിറ്റില് ഹാനിബാലിന് ട്യുണീഷ്യയുടെ ആദ്യ മികച്ച അവസരം ലഭിച്ചെങ്കിലും പന്ത് വലയിലെത്തിക്കാന് താരത്തിന് കഴിഞ്ഞില്ല. 69-ആം മിനിറ്റില് ജപ്പാന് മൂന്നാം ഗോളും നേടി. ഉവേദയുടെ മനോഹരമായ വണ്-ടച്ച് പാസില്നിന്ന് ഓഫ്സൈഡ് ട്രാപ്പ് ചതിച്ച് മുന്നേറിയ ഇതോ, ഗോള്കീപ്പറെ മറികടന്ന് പന്ത് വലയിലെത്തിക്കുകയായിരുന്നു (30). 83ആം മിനിറ്റില് ഉവേദ തന്റെ രണ്ടാമത്തെയും ടീമിന്റെ നാലാമത്തെയും ഗോള് നേടി ട്യുണീഷ്യയുടെ പരാജയം പൂര്ത്തിയാക്കി. സാനോ ബോക്സിന്റെ മറുഭാഗത്തേക്ക് ഉയര്ത്തി നല്കിയ പന്ത് മനോഹരമായ ഹെഡ്ഡറിലൂടെ ഉവേദ വലയിലെത്തിക്കുകയായിരുന്നു (40). ട്യുണീഷ്യക്ക് ജപ്പാന്റെ വേഗമേറിയ കളിശൈലിക്ക് മുന്നില് പിടിച്ചുനില്ക്കാനായില്ല.
Top