കൊച്ചി: ആഡംബര സിനിമാ സമുച്ചയമായ ഡി-സിനിമാസ് നിര്മിക്കാന് ദിലീപ് ചാലക്കുടിയിലെ ഒരേക്കര് സര്ക്കാര് ഭൂമി കയ്യേറിയെന്ന ആരോപണത്തില് അന്വേഷണത്തിന് ഉത്തരവ്. റവന്യുമന്ത്രി ഇ.ചന്ദ്രശേഖരന്റെ ഓഫീസ് തൃശൂര് ജില്ലാ കലക്ടര്ക്ക് നിര്ദേശം നല്കി. വ്യാജ ആധാരങ്ങള് ചമച്ചാണ് ദിലീപ് സ്ഥലം കയ്യേറിയതെന്നായിരുന്നു ആരോപണം. മുന്പ് ഇതില് നടപടിയെടുക്കാന് തുടങ്ങിയ ഭരണകൂടത്തെ മന്ത്രി തടഞ്ഞതായും ആക്ഷേപമുണ്ട്.
സംസ്ഥാന രൂപീകരണത്തിനു മുന്പ് തിരുക്കൊച്ചി മന്ത്രിസഭ ചാലക്കുടി ശ്രീധരമംഗലം ശ്രീകൃഷ്ണ ക്ഷേത്രത്തിന് ഊട്ടുപുര നിര്മിക്കാന് കൈമാറിയ ഒരേക്കര് സ്ഥലം 2005ല് എട്ട് ആധാരങ്ങളുണ്ടാക്കി ദിലീപ് കൈവശപ്പെടുത്തിയെന്നാണു ആരോപണം. ഈ ഭൂമിയില് 35 സെന്റ് ചാലക്കുടി തോടു പുറമ്പോക്കും ഉള്പ്പെടുന്നതായുള്ള റവന്യു റിപ്പോര്ട്ട് മുക്കിയെന്നും ആക്ഷേപമുയര്ന്നിരുന്നു.
എന്നാല് ഈ ഭൂമി നേരിട്ടു ദിലീപിന്റെ കൈവശം വന്നതല്ല. സ്ഥലം വിഭജിച്ച് എട്ടു പേരുകളില് ആധാരം ചെയ്ത ശേഷം ഒരുമിച്ചു ദിലീപ് വാങ്ങുകയായിരുന്നു. ഭൂമി പോക്കുവരവു ചെയ്യാന് റവന്യൂ രേഖകളില് ക്രമക്കേടു നടന്നതായും സംശയിക്കുന്നു. പുനഃരന്വേഷണത്തിനു ലാന്ഡ് റവന്യു കമ്മിഷണര് 2015ല് പുറപ്പെടുവിച്ച ഉത്തരവും ഭരണസ്വാധീനം ഉപയോഗിച്ചു മരവിപ്പിച്ചതായാണ് ആരോപണം.
Top