ഓണ്‍ലൈനായി പബ്ജി കളിക്കുന്നതിനിടെ പരിചയപ്പെട്ട യുവാവിനെ തേടി പാകിസ്ഥാനി യുവതി ഇന്ത്യയിലെത്തി. സീമാ ഗുലാം ഹൈദര്‍ എന്ന പാകിസ്ഥാനി യുവതിയാണ് നാല് കുട്ടികളുമായി ഇന്ത്യയിലെത്തിയത്. ഉത്തര്‍പ്രദേശിലെ നോയിഡയിലാണിവര്‍ സച്ചിനെതേടി വന്നത്. നേപ്പാള്‍ വഴിയാണ് കഴിഞ്ഞ മാസം അനധികൃതമായി യുവതിയും കുഞ്ഞുങ്ങളും ഇന്ത്യയിലെത്തിയത്. പബ്ജി കളിക്കിടെയുള്ള പരിചയം പ്രണയമായി മാറുകയായിരുന്നു. പിന്നീട് ഒന്നിച്ച് ജീവിക്കാന്‍ ഇരുവരും തീരുമാനിച്ചു. എന്നാല്‍ ഇന്ത്യയില്‍ പാലിക്കേണ്ട യാത്രാ നിബന്ധനകള്‍ ശ്രദ്ധിച്ചിരുന്നില്ല. അങ്ങനെയാണ് മെയ്മാസം നോയിഡയിലെത്തിയത്.
സച്ചിന്‍ കാമുകിയെയും കുട്ടികളെയും വാടക വീട്ടില്‍ താമസിപ്പിച്ചു വരികയായിരുന്നു. ഇതിനിടെ ഗ്രേറ്റര്‍ നോയിഡയില്‍ പാകിസ്ഥാന്‍ യുവതി അനധികൃതമായി താമസിക്കുന്നതായി ലോക്കല്‍ പോലീസിന് വിവരം ലഭിച്ചു. തുടര്‍ന്ന് നടത്തിയ അന്വേഷണത്തിലാണ് കാര്യങ്ങളുടെ ചുരുളഴിയുന്നത്.
യുവതിയെ കുറിച്ചുള്ള വിവരം പൊലീസിന് ലഭിച്ചിട്ടുണ്ടാകുമെന്ന് അറിഞ്ഞ സച്ചിന്‍ അവളെയും അവളുടെ നാല് കുട്ടികളെയും കൊണ്ട് സ്ഥലം വിട്ടു. എന്നാല്‍, ഇവര്‍ താമസിച്ചിരുന്ന അപ്പാര്‍ട്ട്മെന്റിന്റെ ഉടമ ബ്രിജേഷ് മേയില്‍ വീട് വാടകയ്ക്കെടുത്തതായി പൊലീസിനോട് പറഞ്ഞു. തുടര്‍ന്നാണിരുവരും പിടിയിലാകുന്നത്.
Top