കൊതുകിനെ തുരത്താനും ടെലിവിഷന്‍; എല്‍ജി പുതിയ മോഡല്‍ പുറത്തിറക്കി

ഈ ടിവി നിങ്ങളുടെ വീട്ടിലുണ്ടെങ്കില്‍ കൊതുകിന്റെ ശല്യമുണ്ടാകില്ല. എല്‍ജി പുതിയ മോഡല്‍ ടെലിവിഷന്‍ ഇറക്കി. ‘കൊതുകിനെ തുരത്തും ടിവി’ എന്നാണ് ഈ ടിവിയുടെ വിശേഷണം. കൊതുകിനെ തുരത്താന്‍ ഇനി നിങ്ങള്‍ മറ്റ് മാര്‍ഗങ്ങളൊന്നും സ്വീകരിക്കേണ്ട. അതങ്ങനെ സാധ്യമാകും എന്നായിരിക്കും നിങ്ങളുടെ ചോദ്യം അല്ലേ?

കഴിഞ്ഞദിവസം എല്‍ജി തങ്ങളുടെ പുതിയ മോഡല്‍ പുറത്തിറക്കി. ഇന്ത്യന്‍ വിപണിയില്‍ 26,900 , 47,500 രൂപയാകും പുതിയ മോഡലുകള്‍ക്ക് വില വരുക. എല്‍ജിയുടെ കൊതുകിനെ തുരത്തും ടിവിയില്‍ ഘടിപ്പിച്ചിരിക്കുന്ന അള്‍ട്രാസോണിക് ഉപകരണമാണ് കൊതുകുകളെ ടെലിവിഷന്റെ ചുറ്റുപാടില്‍ നിന്ന് തുരത്തുന്നത്. ശബ്ദതരംഗ ടെക്നോളജി ഉപയോഗിച്ചാണ് ഈ ഉപകരണം പ്രവര്‍ത്തിക്കുന്നത്. പുതിയ ടെക്നോളജിയില്‍ വിഷപദാര്‍ത്ഥങ്ങളോ കെമിക്കലുകളോ ഉപയോഗിക്കുന്നില്ല. ടെലിവിഷനില്‍ നിന്ന് ദോഷകരമായ റേഡിയേഷനോ ഉണ്ടാകുന്നില്ലെന്ന് കമ്പനി അവകാശപ്പെടുന്നു.

ഇന്ത്യയുടെ ചുറ്റുപാടുകള്‍ക്ക് അനുസൃതമായ രീതിയിലാണ് എല്‍ജി ഓരോ ഉത്പ്പന്നങ്ങളും പുറത്തിറക്കുന്നതും അവ ഇന്ത്യയിലെ ഉപയോക്താക്കള്‍ക്ക് ഉപയോഗപ്രദമായതാണെന്നും എല്‍ജി ഇലക്രോണിക്സ് ഡയറക്ടര്‍ ഹവാര്‍ഡ് ലീ പറഞ്ഞു. ‘കൊതുകിനെ തുരത്തും ടിവി ‘ എല്ലാ എല്‍ജിയുടെ ബ്രാന്റ് സ്റ്റോറുകളിലും ലഭ്യമാണ്. 32ഇഞ്ച് ടിവിക്ക് 26,900 രൂപയും 42ഇഞ്ചിന് 47,500 രൂപയുമാണ് വിപണിയിലെ വില.