മോഹൻ ഭ​ഗവതിന്റെ സുരക്ഷ വർദ്ധിപ്പിച്ചു..ഇനി ആർഎസ്എസ് സർ സംഘ ചാലകിന്റെ സുരക്ഷ അമിത് ഷായ്ക്കും രാജ് നാഥ് സിം​ഗിനും തുല്യം

അധികമായി ഉയരുന്ന ഭീഷണിയുടെയും സുരക്ഷ കുറവാണെന്ന അവലോകനത്തിന്റെയും പശ്ചാത്തലത്തിൽ ആർഎസ്എസ് സർ സംഘ ചാലക് മോഹൻ ഭ​ഗവതിന്റെ സുരക്ഷ വർദ്ധിപ്പിച്ചു. ആഭ്യന്തര മന്ത്രി അമിത് ഷായ്ക്കും പ്രതിരോധ മന്ത്രി രാജ് നാഥ് സിം​ഗിനുമുള്ള അഡ്വാൻസ് സെക്യൂരിറ്റി ലെയ്‌സൺ (എഎസ്എൽ) സുരക്ഷയാണ് ഭഗവതിന് നൽകിയിരിക്കുന്നത്.

മുമ്പ് Z+ സുരക്ഷയായിരുന്നു മോഹൻ ഭാ​ഗവതിന് നൽകിയിരുന്നത്. Z+ നൊപ്പം ASL സുരക്ഷ ലഭിക്കുന്നവരായ കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിംഗ്, രാഹുൽ ഗാന്ധി, സോണിയ ഗാന്ധി, പ്രിയങ്ക വാദ്ര എന്നിവരുടെ പട്ടികയിൽ ഇനിമുതൽ മോഹൻ ഭ​ഗവതും ഉൾപ്പെടും.

ഈ പ്രോട്ടോകോൾ പ്രകാരം മോഹൻ ഭ​ഗവതിന് ജില്ലാ ഭരണകൂടങ്ങളും പൊലീസും ആരോഗ്യ വകുപ്പുകളും ഡെപ്യൂട്ടേഷനിൽ എത്തിയ ഉദ്യോഗസ്ഥരും ഗാർഡുകളും ഉൾപ്പെടെയുള്ളവരാണ് സുരക്ഷയിൽ സജീവ പങ്കാളിത്തം വഹിക്കുന്നത്. മൾട്ടി-ലേയേർഡ് സെക്യൂരിറ്റി റിംഗുകൾ, പ്രീ-വിസിറ്റ് റിവ്യൂ റിഹേഴ്സലുകളും ഈ സുരക്ഷാ സംവിധാനത്തിൽ ഉൾപ്പെടുന്നതാണ്. ഇത് കൂടാതെ, ഹെലികോപ്റ്ററുകളും ഉണ്ടായിരിക്കുന്നതാണ്.

പ്രധാനമന്ത്രിയടെ സുരക്ഷയുമായി മോഹൻ ഭാ​ഗവതിന്റെ സുരക്ഷയെ താരതമ്യം ചെയ്യാൻ സാധിക്കില്ലെന്നാണ് സംരക്ഷകരുടെ സുരക്ഷ മേൽനോട്ടം വഹിക്കുന്ന ഒരു മുതിർന്ന ഉദ്യോഗസ്ഥൻ പറയുന്നത്. ഇന്ത്യയുടെ പ്രധാനമന്ത്രിക്ക് വ്യത്യസ്ത തലത്തിലുള്ള സുരക്ഷകളാണ് ലഭിക്കുന്നത്. പ്രധാനമന്ത്രിയുടെ സുരക്ഷയിൽ എസ്‌പിജി, എസ്പിഎൽ തുടങ്ങിയ വിഭാ​ഗങ്ങളും ഉൾപ്പെടുന്നുണ്ട്.