നെടുമ്പാശ്ശേരിയിൽ നിന്നും വിമാനങ്ങൾ നാളെ ഉച്ച മുതൽ; ടിക്കറ്റ് ബുക്ക് ചെയ്ത എല്ലാ യാത്രക്കാർക്കും യാത്ര ഉറപ്പായേക്കും; യാത്ര നീട്ടിവച്ചവർക്കും ഇനി തടസ്സമില്ലാതെ മടങ്ങാം…

കൊച്ചി: മഹാപ്രളയത്തെയും പീന്നീടുണ്ടായ വെള്ളപ്പൊക്കത്തെയും തുടർന്ന് അടച്ചിട്ട നെടുമ്പാശേരി വിമാനത്താവളം ബുധനാഴ്ച തുറക്കും. ഉച്ചയ്ക്ക് രണ്ടു മണി മുതൽ ആഭ്യന്തര, രാജ്യാന്തര സർവീസുകൾ സാധാരണനിലയിൽ നടത്തുമെന്നു വിമാനത്താവള കമ്പനി അറിയിച്ചു. കൊച്ചി നേവൽ ബേസിൽ നിന്നുള്ള വിമാനസർവീസുകൾ ബുധനാഴ്ച ഉച്ചയോടെ അവസാനിപ്പിക്കും. യാത്രക്കാർക്ക് ടിക്കറ്റുകൾ ബുക്ക് ചെയ്യാനുള്ള അവസരം ലഭ്യമാക്കിയിട്ടുണ്ടെന്നും സിയാൽ അധികൃതർ അറിയിച്ചു. ഇടുക്കി ചെറുതോണി അണക്കെട്ട് തുറന്നതും കനത്ത മഴ തുടർന്നതും മൂലം വെള്ളം കയറിയതിനെ തുടർന്നാണ് നെടുമ്പാശേരി വിമാനത്താവളം അടച്ചത്.

വെള്ളം കയറിയതോടെ ആദ്യം 18 വരെയും പിന്നീട് 26 വരെയും വിമാനത്താവളം അടച്ചു. എയർലൈനുകൾ, ഗ്രൗണ്ട് ഹാൻഡ്ലിങ് ഏജൻസികൾ ഉൾപ്പെടെ വിമാനത്താവളവുമായി ബന്ധപ്പെട്ടു പ്രവർത്തിക്കുന്ന വിവിധ വിഭാഗങ്ങളിലെ ജീവനക്കാരിൽ 90 ശതമാനവും പ്രളയക്കെടുതികൾ നേരിട്ടതും തിരിച്ചടിയായി. ഇതേത്തുടർന്നാണ് വിമാനത്താവളം തുറക്കുന്നതു നീട്ടിയത്.