വിവാഹം കഴിക്കാന്‍ പെണ്ണ് കണ്ടെത്തി നല്‍കിയില്ല; മകന്‍ അമ്മയെ കല്ലുകൊണ്ട് അടിച്ച് കൊലപ്പെടുത്തി

ഹൈദരാബാദ്: വിവാഹം കഴിക്കാന്‍ പെണ്ണ് കണ്ടെത്തി നല്‍കാത്തതില്‍ രോഷാകുലനായി മകന്‍ അമ്മയെ ക്രൂരമായി കൊലപ്പെടുത്തി. തെലങ്കാനയിലെ സിദ്ദിപേട്ട് ജില്ലയിലാണ് 45കാരി കൊല്ലപ്പെട്ടത്. ബന്ദ മൈലാറാം ഗ്രാമത്തില്‍ കഴിഞ്ഞ ദിവസം രാത്രിയാണ് സംഭവം. കല്ലുകൊണ്ട് അടിച്ചാണ് യുവതിയെ കൊലപ്പെടുത്തിയത്. പിന്നീട് പൊലീസിനെ തെറ്റിദ്ധരിപ്പിക്കാന്‍ കഴുത്തറുക്കുകയും കാലുകള്‍ മുറിച്ചുമാറ്റുകയും ചെയ്തു.

യുവാവിനൊപ്പം കൊല്ലപ്പെട്ട സ്ത്രീയുടെ ബന്ധുവും അറസ്റ്റിലായിട്ടുണ്ടെന്ന് പൊലീസ് അറിയിച്ചു. സ്ത്രീയുടെ മകള്‍ നല്‍കിയ പരാതിയിലാണ് പൊലീസ് അന്വേഷണം നടത്തിയത്. പ്രതികള്‍ പൊലീസിനോട് കുറ്റം സമ്മതിച്ചിട്ടുണ്ട്.