കേരളത്തില്‍ 97 ശതമാനം പേരും മാംസാഹാരം ഇഷ്ടപ്പെടുന്നവര്‍; ഇന്ത്യയില്‍ ഏറ്റവും കൂടുതല്‍ ഇറച്ചികൊതിയാന്‍മാര്‍ തെലുങ്കാനയില്‍

ന്യൂഡല്‍ഹി: കേരളത്തില്‍ 97 ശതമാനം പേരും മാംസാഹാരം ഉപയോഗിക്കുന്നവര്‍. 97.4 ശതമാനം പേര്‍ സ്ത്രീകളും 96.6 ശതമാനം പുരുഷന്മാരുമാണ്. രാജ്യത്ത് മാംസാഹാരം കഴിക്കുന്നവരുടെ എണ്ണത്തില്‍ ഒന്നാമത് തെലുങ്കാനയെന്നാണ് കേന്ദ്ര സര്‍ക്കാര്‍ സര്‍വേ പറയുന്നത്. ഇവിടെ 99 ശതമാനം ആളുകളും മാംസാഹാരം കഴിക്കുന്നവരെന്നാണ് റിപ്പോര്‍ട്ട്.

രാജസ്ഥാനാണ് സസ്യാഹരികളുടെ എണ്ണത്തില്‍ മുന്നില്‍ നില്‍ക്കുന്നത്. ഇവിടെ വെറും 25 ശതമാനം ആളുകള്‍ മാത്രമാണ് മാംസാഹാരം കഴിക്കുന്നത്. പഞ്ചാബ്, ഹരിയാന എന്നീ സംസ്ഥാനങ്ങളാണ് രാജസ്ഥാന് തൊട്ടുപിന്നില്‍.

കേന്ദ്രസര്‍ക്കാരിന്റെ സാമ്പിള്‍ രജിസ്‌ട്രേഷന്‍ സിസ്റ്റം ബേസ് ലൈന്‍ സര്‍വ്വേയിലാണ് ഇത് കണ്ടെത്തിയിരിക്കുന്നത്. മാംസാഹാരം കഴിക്കുന്ന സംസ്ഥാനങ്ങളുടെ എണ്ണത്തില്‍ അഞ്ചാം സ്ഥാനത്താണ് കേരളം. തെലുങ്കാനയ്ക്ക് പുറമെ പശ്ചിമ ബംഗാള്‍, ആന്ധ്രാപ്രദേശ്, ഒറീസ എന്നീ സംസ്ഥാനങ്ങളാണുള്ളത്.

കഴിഞ്ഞ പത്തുവര്‍ഷത്തിനിടയില്‍ രാജ്യത്ത് മാംസാഹാരം കഴിക്കുന്നവരുടെ എണ്ണത്തില്‍ കുറവു വന്നതായും സര്‍വെ വ്യക്തമാക്കുന്നു. 2004ല്‍ 75 ശതമാനം പേരാണ് മാംസാഹാരം കഴിച്ചിരുന്നതെങ്കില്‍ 2014ല്‍ ഇതു 71 ശതമാനമായി കുറഞ്ഞു. പതിനഞ്ച് വയസില്‍ കൂടുതല്‍ പ്രായമുള്ളവരുടെ ഇടയിലാണ് സര്‍വേ നടത്തിയത്.

അതേ സമയംപ്രധാന മന്ത്രി നരേന്ദ്ര മോഡി യുടെ സംസ്ഥാനമായ ഗുജറാത്തില്‍ അഞ്ചില്‍ രണ്ട് പേര്‍ മാംസാഹാരം ഇഷ്ട്ടപ്പെടുന്നവര്‍ ആണെന്നും സര്‍വേ വ്യക്തമാക്കുന്നു..ഗുജറാത്തില്‍ 60.80 % പേര്‍ സസ്യാഹാരികളും 39.05 % പേര്‍ മാംസം ഇഷ്ട്ടപ്പെടുന്നവരാണ്.

Top