ശ്രീനഗര്: ഹരിയാനയിലെ ഫരീദാബാദില് വന് സ്ഫോടകവസ്തു ശേഖരം പിടിച്ചെടുത്തതിനും ഡല്ഹിയിലെ സ്ഫോടനങ്ങള്ക്കും പിന്നാലെ, ജമ്മു കശ്മീരിലെ കുല്ഗാം ജില്ലയിലെ നിരോധിത ജമാഅത്തെ ഇസ്ലാമി (ജെഇഐ)ക്കെതിരെ ബുധനാഴ്ച പോലീസ് വന് ഓപ്പറേഷന് ആരംഭിച്ചു. 300 ലധികം സ്ഥലങ്ങളില് റെയ്ഡ് നടത്തി നിരവധി വസ്തുക്കളും ഡിജിറ്റല് ഉപകരണങ്ങളും പിടിച്ചെടുത്തു.
കഴിഞ്ഞ നാല് ദിവസത്തിനുള്ളില് 500-ലധികം പേരെ ചോദ്യം ചെയ്തു, അവരില് പലരെയും അറസ്റ്റ് ചെയ്തു. സുരക്ഷാ ഉദ്യോഗസ്ഥര് ജില്ലയില് 400 കോര്ഡണ് ആന്ഡ് സെര്ച്ച് ഓപ്പറേഷനുകള് (സിഎഎസ്ഒ) ആരംഭിച്ചു. ജെ.ഇ.ഐ അംഗങ്ങളുടെയും അവരുടെ കൂട്ടാളികളുടെയും വീടുകളിലും പരിസരങ്ങളിലുമാണ് റെയ്ഡ് നടത്തിയത്.
നിരോധിത സംഘടനയായ ജമാഅത്തെ ഇസ്ലാമിക്കെതിരെ കുല്ഗാം പോലീസ് വലിയ തോതിലുള്ള ഓപ്പറേഷനാണ് ആരംഭിച്ചത്. 2019 ല് കേന്ദ്ര സര്ക്കാര് ഈ സംഘടനയെ നിരോധിച്ചതിനുശേഷം, അതിന്റെ മുതിര്ന്ന നേതാക്കളെ പലരെയും അറസ്റ്റ് ചെയ്ത് ജയിലിലടക്കുകയും ചെയ്തിരുന്നു.
ഭീകരതയെ താഴെത്തട്ടില് തന്നെ അടിച്ചമര്ത്തുന്നതിനുള്ള തുടര്ച്ചയായ ശ്രമങ്ങളുടെ ഭാഗമായാണ് ജമാഅത്ത് അംഗങ്ങളുടെയും അവരുടെ കൂട്ടാളികളുടെയും വീടുകളിലും സ്ഥലങ്ങളിലും റെയ്ഡ് നടത്തിയതെന്ന് പോലീസ് വക്താവ് മാധ്യമങ്ങളോട് പറഞ്ഞു. അറസ്റ്റ് ചെയ്തവരെ തീവ്രവാദ വിരുദ്ധ നിയമപ്രകാരം അനന്ത്നാഗിലെ ജില്ലാ ജയിലിലേക്ക് മാറ്റി.
ഷോപ്പിയാനിലും ജെഇഐ പ്രവര്ത്തകരെ ലക്ഷ്യമിട്ട് സമാനമായ പരിശോധനകള് നടന്നിട്ടുണ്ട്. ഡല്ഹി സ്ഫോടനങ്ങളെത്തുടര്ന്ന് ജമ്മു കശ്മീരിലുടനീളം സുരക്ഷ ശക്തമാക്കിയിട്ടുണ്ട്, വാഹന പരിശോധനകളും തിരച്ചില് പ്രവര്ത്തനങ്ങളും (സിഎഎസ്ഒ) ശക്തമാക്കിയിട്ടുണ്ട്.
Top