ചെറിയ കൊതുകിന് അ‍ഞ്ച് പൈസ, വലുതിന് 50 പൈസ ; വേറിട്ടൊരു യൂത്ത് കോൺഗ്രസ് സമരം

കൊച്ചി : കൊതുക് കടി കൊണ്ട് കൊച്ചി നഗരവാസികളുടെ ഉറക്കം നഷ്ടപെടുമ്പോഴും പ്രതിവിധി കാണാത്ത കോർപ്പറേഷനെതിരെ വ്യത്യസ്ഥ സമരവുമായി രംഗത്ത് എത്തിയിരിക്കുകയാണ് യൂത്ത് കോൺഗ്രസ്. ജനങ്ങൾ കൊന്ന് കൊണ്ടുവരുന്ന കൊതുകിന് പ്രതിഫലം നൽകിയാണ് യൂത്ത് കോൺഗ്രസ് പ്രവർത്തകർ പ്രതിഷേധിച്ചത്

കൊതുകിന്റെ വലിപ്പത്തിനനുസരിച്ച് അ‍ഞ്ച് പൈസ മുതൽ 50 പൈസ വരെയാണ് നൽകിയത്. പ്രതിഷേധത്തിന്റെ ഭാഗമായി കൊതുക് കൈമാറാനും നിരവധി പേർ എത്തി. നഗരത്തിൽ കൊതുക് ശല്യം രൂക്ഷമാകുന്പോഴും ഫോഗിംഗ് ഉൾപ്പെടെയുള്ള നിവാരണ പ്രവർത്തനങ്ങൾ നാമമാത്രമാമെന്നാണ് ആക്ഷേപം. ഓടകളിൽ മരുന്ന് തളിക്കലും ഫലപ്രദമല്ലെന്ന് പരാതിയുണ്ട്.

യൂത്ത് കോൺഗ്രസ് എറണാകുളം മണ്ഡലം കമ്മിറ്റിയുടെ നേതൃത്ത്വത്തിലായിരുന്നു സമരം നടന്നത്. കഴിഞ്ഞ ദിവസം കോ‍ർപ്പറേഷനിലെ പ്രതിപക്ഷ വനിതാ കൗൺസിലർമാർ കൊതുക് ബാറ്റുകളേന്തി തിരുവാതിര കളി നടത്തി പ്രതിഷേധിച്ചിരുന്നു. മട്ടാഞ്ചരിയിൽ കൊതുകു പിടിത്ത മത്സരവും നടന്നിരുന്നു.