തിരുവനന്തപുരം: മീന് വിറ്റ് ഉപജീവനം നടത്തുന്ന തൊടുപുഴ അല് അസ്ഹര് കോളെജ് വിദ്യാര്ഥിനി ഹനാനെതിരെ സാമൂഹ്യമാധ്യമങ്ങളില് പ്രചരണം നടത്തി അപമാനിച്ചവര്ക്കെതിരെ അന്വേഷണത്തിന് ഉത്തരവുമായി ഡിജിപി. കേസില് ഹൈടെക് സെല്ലും സൈബര് ഡോമും അന്വേഷണം നടത്തും. ഇത് സംബന്ധിച്ച് സൈബര്സെല് പ്രാഥമിക വിവര ശേഖരണം ആരംഭിച്ചു. സ്വമേധയാ കേസെടുക്കുന്ന കാര്യവും പരിശോധിക്കും. സമൂഹമാധ്യമങ്ങളിലൂടെ അപമാനിച്ചവര്ക്കെതിരെ വൈകീട്ടോടെ എഫ്ഐആര് രെജിസ്റ്റര് ചെയ്യുമെന്ന് പൊലീസ് അറിയിച്ചു. ഹനാനെതിരെ സാമൂഹ്യമാധ്യമങ്ങളില് പ്രചരണം നടത്തിയവര്ക്കെതിരെ സൈബര് നിയമപ്രകാരം കേസെടുക്കണമെന്ന് വിഎസ് അച്യുതാനന്ദന് ആവശ്യപ്പെട്ടിരുന്നു.
കുറ്റവാളികളെ നിയമത്തിന് മുന്നില് കൊണ്ടുവരാന് പൊലീസ് മുന്നോട്ടുവരണമെന്നും വി.എസ്. പ്രസ്താവനയില് പറഞ്ഞു. ഹനാനെതിരെ സംഘടിതമായാണ് സോഷ്യല് മീഡിയയില് അപവാദപ്രചരണം നടന്നത്. ഇതിനെതിരെ കര്ശന നടപടി എടുക്കണം. അതിജീവനത്തിനു വേണ്ടിയുള്ള ഹനാന്റെ പോരാട്ടത്തെ അഭിനന്ദിക്കുന്നുവെന്നും അദ്ദേഹം കൂട്ടിച്ചേര്ത്തു. അതേസമയം, പഠിക്കാനും കുടുംബത്തെ സഹായിക്കാനുമുളള പണമുണ്ടാക്കാന് കൊച്ചിയില് തൊഴില് ചെയ്യാനിറങ്ങിയ തൊടുപുഴ അല് അസ്ഹര് കോളെജ് വിദ്യാര്ഥിനി ഹനാനെതിരെ സമൂഹമാധ്യമങ്ങളില് അവഹേളനപരമായ പ്രചരണം നടത്തിയവര്ക്കെതിരെ നടപടിയെടുക്കാന് മുഖ്യമന്ത്രിയുടെ ഓഫീസ് പൊലീസിന് നിര്ദേശം നല്കിയിരുന്നു.
ഹനാന് ആവശ്യമായ സംരക്ഷണം നല്കാന് എറണാകുളം ജില്ലാ കലക്ടറോടും ആവശ്യപ്പെട്ടിട്ടുണ്ട്. പ്രചരണങ്ങളില് തളരാതെ മുന്നേറാന് ഹനാന് എല്ലാ പിന്തുണയും വാഗ്ദാനം ചെയ്യുന്നുവെന്ന് മുഖ്യമന്ത്രി ഫെയ്സ്ബുക്കില് കുറിച്ചു.