മെല്ബണ്: ഓസ്ട്രേലിയന് മാധ്യമങ്ങളില് വലിയ വാര്ത്താ പ്രാധാന്യം നേടി പ്രധാനമന്ത്രി നരേന്ദ്ര മോദിയുടെ ഓസ്ട്രേലിയന് സന്ദര്ശനം. ‘ദ ഓസ്ട്രേലിയന്’ ഉള്പ്പെടെയുള്ള പ്രമുഖ പത്രങ്ങള് തങ്ങളുടെ ഒന്നാം പേജില് തന്നെ മോദിയുടെ സന്ദര്ശനം റിപ്പോര്ട്ട് ചെയ്തു. മോദിയെ ‘മിസ്റ്റര് ഇന്ത്യ’ എന്നും ഒരു മാധ്യമത്തില് വിശേഷിപ്പിച്ചിട്ടുണ്ട്. ‘വ്യാപാരത്തിലും പ്രതിരോധത്തിലും സമ്മാനങ്ങളുമായി മോദി എത്തുന്നു’ എന്ന തലക്കെട്ടോടെയാണ് പല പത്രങ്ങളും വാര്ത്ത നല്കിയത്. ‘ദ ഏജ്’ എന്ന പത്രം ‘അല്ബനീസിന്റെ മോദി ഓപ്പറാന്ഡി’ എന്ന തലക്കെട്ടിലാണ് സന്ദര്ശനം റിപ്പോര്ട്ട് ചെയ്തത്.
സന്ദര്ശനത്തിന്റെ ഭാഗമായി വ്യാപാരം, ഊര്ജ്ജം തുടങ്ങിയ നിര്ണ്ണായക മേഖലകളില് വലിയ കരാറുകളാണ് ഇരുരാജ്യങ്ങളും തമ്മില് ഒപ്പിട്ടത്. സമാധാനപരമായ ആവശ്യങ്ങള്ക്കായി ആണവോര്ജ്ജം ഉത്പാദിപ്പിക്കുന്നതിന് ഓസ്ട്രേലിയയില് നിന്ന് ഇന്ത്യയിലേക്ക് യുറേനിയം കയറ്റുമതി ചെയ്യുന്നതിനുള്ള കരാറില് ഇരുരാജ്യങ്ങളും ധാരണയിലെത്തി. ഇതിനുപുറമെ പുനരുപയോഗ ഊര്ജ്ജം, നിര്ണ്ണായക ധാതുക്കള്, ഗ്രീന് ഹൈഡ്രജന് തുടങ്ങിയ മേഖലകളില് സഹകരണം വര്ദ്ധിപ്പിക്കാനും തീരുമാനമായി.
ഇന്ത്യയിലെ അടിസ്ഥാന സൗകര്യ വികസന മേഖലയിലേക്ക് ഓസ്ട്രേലിയന് നിക്ഷേപകരെ പ്രധാനമന്ത്രി സ്വാഗതം ചെയ്തു. റോഡുകള്, തുറമുഖങ്ങള്, റെയില്വേ പദ്ധതികള് എന്നിവയില് ഓസ്ട്രേലിയന് കമ്പനികള്ക്ക് മികച്ച അവസരങ്ങളാണ് ഉള്ളതെന്ന് മോദി പറഞ്ഞു. ഇതിന്റെ ഭാഗമായി ഓസ്ട്രേലിയയിലെ ഏറ്റവും വലിയ പെന്ഷന് ഫണ്ടായ ‘ഓസ്ട്രേലിയന് സൂപ്പര്’ ഇന്ത്യയുടെ നാഷണല് ഇന്വെസ്റ്റ്മെന്റ് ആന്ഡ് ഇന്ഫ്രാസ്ട്രക്ചര് ഫണ്ടിലേക്ക് 500 മില്യണ് ഓസ്ട്രേലിയന് ഡോളറിന്റെ അധിക നിക്ഷേപം പ്രഖ്യാപിച്ചു. ഇരുരാജ്യങ്ങളും തമ്മിലുള്ള സാമ്പത്തിക ബന്ധങ്ങള് പുതിയ തലങ്ങളിലേക്ക് ഉയരുന്നതിന്റെ സൂചനയാണിത്.
ഉച്ചകോടിക്ക് ശേഷം മെല്ബണില് നടത്തിയ സംയുക്ത പ്രസ്താവനയില് ഇന്ത്യയും ഓസ്ട്രേലിയയും അടുത്ത സുഹൃത്തുക്കളാണെന്ന് പ്രധാനമന്ത്രി ആന്റണി അല്ബനീസ് പറഞ്ഞു. സാമ്പത്തിക ബന്ധങ്ങള് പുനര്നിര്മ്മിക്കുന്നതില് മോദി വഹിച്ച പങ്കിനെ അദ്ദേഹം പ്രശംസിച്ചു. ഈ പങ്കാളിത്തം ചരിത്രപരമായ അവസരങ്ങളാണ് തുറന്നുതരുന്നതെന്ന് നരേന്ദ്ര മോദിയും പ്രതികരിച്ചു.
Top