മലയാളത്തിലെ മികച്ച നടിമാരിലൊരാളായ ശോഭനയും മോഹന്‍ലാലും ഒരുമിച്ചെത്തിയ സിനിമകളെല്ലാം പ്രേക്ഷകര്‍ ഇന്നും ഓര്‍ത്തിരിക്കുന്നുണ്ട്. മിന്നാരം, പവിത്രം, മായാമയൂരം, വെള്ളാനകളുടെ നാട്, തേന്മാവിന്‍ കൊമ്പത്ത്, ഉള്ളടക്കം തുടങ്ങി 15 ലധികം ചിത്രങ്ങളിലാണ് ഇരുവരും ഒരുമിച്ചെത്തിയത്. നര്‍ത്തകിയായും അഭിനേത്രിയായും പ്രേക്ഷക മനസ്സില്‍ നിറഞ്ഞുനില്‍ക്കുകയാണ് ശോഭന. പ്രിയദര്‍ശന്‍ മോഹന്‍ലാല്‍ കൂട്ടുകെട്ടില്‍ പുറത്തിറങ്ങുന്ന മരക്കാര്‍ അറബിക്കടലിന്റെ സിംഹം ലൊക്കേഷനിലേക്ക് ശോഭനയും എത്തിയിരുന്നുവെന്നുള്ള റിപ്പോര്‍ട്ടുകളാണ് ഇപ്പോള്‍ സോഷ്യല്‍ മീഡിയയിലൂടെ വൈറലായിക്കൊണ്ടിരിക്കുന്നത്. ഹൈദരാബാദിലെ റാമോജി ഫിലിംസിറ്റിയില്‍ വെച്ചാണ് മരക്കാര്‍ അറബിക്കടലിന്റെ സിംഹത്തിന്റെ ചിത്രീകരണം നടക്കുന്നത്. ആദ്യ ഷെഡ്യൂളിന് ശേഷമുള്ള ഇടവേള അവസാനിപ്പിച്ച് താരങ്ങളും അണിയറപ്രവര്‍ത്തകരുമെല്ലാം വീണ്ടും സെറ്റിയിലേക്കെത്തിയിരിക്കുകയാണ് ഇപ്പോള്‍. മരക്കാറിന്റെ സെറ്റിലേക്ക് ശോഭനയെത്തിയെന്നുള്ള റിപ്പോര്‍ട്ടുകളാണ് ഇപ്പോള്‍ സോഷ്യല്‍ മീഡിയയിലൂടെ പ്രചരിക്കുന്നത്.
നേരത്തെ തെന്നിന്ത്യന്‍ സിനിമയുടെ സ്വന്തം താരമായ തലയും സെറ്റില്‍ സന്ദര്‍ശനം നടത്തിയിരുന്നു. ശോഭന പുതിയതായി ചിട്ടപ്പെടുത്തുന്ന നൃത്തശില്‍പ്പവുമായി ബന്ധപ്പെട്ട കാര്യങ്ങളെക്കുറിച്ച് സംസാരിക്കാനായാണ് താരമെത്തിയതെന്നുള്ള റിപ്പോര്‍ട്ടുകളാണ് പുറത്തുവന്നിട്ടുള്ളത്. മോഹന്‍ലാലും ഈ പരിപാടിയുമായി സഹകരിക്കുന്നുണ്ടെന്നും മുംബൈയിലും ഡല്‍ഹിയിലുമായി നടക്കുന്ന ആദ്യ ഷോകളില്‍ താരം പങ്കെടുത്തേക്കുമെന്നുമുള്ള അഭ്യൂഹങ്ങളാണ് ഇപ്പോള്‍ പ്രചരിക്കുന്നത്. ശോഭനയുടെ സന്ദര്‍ശനത്തിന് പിന്നാലെയായാണ് ഇത്തരത്തിലൊരു കാര്യം പ്രചരിച്ച് തുടങ്ങിയത്.
അധികമാരും ചെയ്യാത്ത പ്രമേയമാണ് ശോഭന തന്റെ നൃത്തശില്‍പ്പത്തിനായി തിരഞ്ഞെടുത്തത്. മഹാഭാരതത്തില്‍ പാണ്ഡവരുടെ വനവാസ കാലത്ത് നടന്ന സംഭവത്തെക്കുറിച്ചാണ് നൃത്തശില്‍പ്പമെന്നും റിപ്പോര്‍ട്ടുകളില്‍ പറയുന്നു. സംസ്‌കൃതത്തിലാണ് ഇത് ചിട്ടപ്പെടുത്തിയിരിക്കുന്നതെന്നുള്ള വിവരങ്ങളും പുറത്തുവന്നിട്ടുണ്ട്. മോഹന്‍ലാല്‍ ആ ഓഫര്‍ സ്വീകരിച്ചോയെന്ന കാര്യത്തെക്കുറിച്ചറിയാനായി കാത്തിരിക്കുകയാണ് ആരാധകര്‍. നേരത്തെയും മോഹന്‍ലാല്‍ ശോഭനയുടെ നൃത്തശില്‍പ്പങ്ങളില്‍ സഹകരിച്ചിരുന്നു.
Top