മുംബൈ: മദ്യപാനത്തിനിടെ 30 വര്‍ഷങ്ങള്‍ക്ക് മുന്‍പ് നടത്തിയ കൊലപാതകത്തിന്റെ വിവരങ്ങള്‍ വെളിപ്പെടുത്തിയ ആള്‍ പോലീസ് പിടിയിലായി.മുംബൈയിലെ വിഖ്രോലിയില്‍ സ്ഥിരതാമസമാക്കിയ അമിത് പവാര്‍ ആണ് പിടിയിലായത്. 1993ല്‍ മഹാരാഷ്ട്രയിലെ ലോനവാലയില്‍ കട നടത്തുകയായിരുന്നു അവിനാശ് പവാര്‍. സമീപത്ത് താമസിച്ചിരുന്ന വൃദ്ധ ദമ്പതികളെയാണ് മോഷണത്തിനിടെ കൊന്നത്.കൃത്യം നടത്തിയ ഇയാള്‍ ഉടന്‍ ലോനവാല വിട്ട് മഹാരാഷ്ട്രയിലെ ഔറംഗാബാദിലേക്ക് എത്തി പിന്നെയും കുറെ സ്ഥലങ്ങള്‍ കറങ്ങിയാണ് മുംബൈയിലെ വിഖ്രോലിയില്‍ എത്തി സ്ഥിരതാമസമാക്കിയത്.അവിനാശ് പവാര്‍ എന്ന പേര് മാറ്റി അമിത് പവാര്‍ ആകുകയും ആധാര്‍ കാര്‍ഡ് സ്വന്തമാക്കുകയും, അവിടെ നിന്ന് ഒരു സ്ത്രീയെ വിവാഹം കഴിക്കുകയും ചെയ്തു.
വൃദ്ധ ദമ്പതികളെ കൊലപ്പെടുത്തിയ വിവരം മദ്യപാനത്തിനിടെ ഒരു വീരകൃത്യമെന്ന നിലയില്‍ അവിനാശ് സുഹൃത്തുക്കളോട് വിശദീകരിച്ചു. എന്നാല്‍ സുഹൃത്തുക്കളിലൊരാള്‍ ഇക്കാര്യം മുംബൈ ക്രൈംബ്രാഞ്ച് സീനിയര്‍ പൊലീസ് ഇന്‍സ്പെക്ടറും എന്‍കൗണ്ടര്‍ സ്പെഷ്യലിസ്റ്റുമായ ദയ നായക്കിനെ അറിയിക്കുകയായിരുന്നു . പിന്നാലെ അവിനാശ് അറസ്റ്റിലുമായി.
Top