ഗുരുവായൂർ ശ്രീകൃഷ്ണ ക്ഷേത്രത്തിലെ കല്ല്യാണത്തിരക്കിൽ പുതിയ റെക്കോർഡ്. ആഗസ്റ്റ് 27 ഞായറാഴ്ച ഇനി ഗുരുവായൂർ ക്ഷേത്രത്തിൽ ചരിത്രത്തിലേറ്റവും കൂടുതൽ വിവാഹ ചടങ്ങുകൾ നടന്ന ദിവസമായി അറിയപ്പെടും.
ചിങ്ങമാസത്തിൽ ഏറ്റവുമധികം മുഹൂർത്തങ്ങളുള്ള ഏക അവധി ദിവസമായിരുന്നു ആഗസ്റ്റ് 27 ഞായറാഴ്ച.
ഇതുതന്നെയാണ് ഗുരുവായൂരിൽ വിവാഹങ്ങളുടെ എണ്ണം വർദ്ധിക്കാനും കാരണമായത്. 277 വിവാഹങ്ങളാണ് ഞായറാഴ്ച ഗുരുവായൂരിൽ നടന്നത്. കഴിഞ്ഞ വർഷം സെപ്റ്റംബർ നാലിനാണ് ഇതിനു മുൻപ് ഏറ്റവും കൂടുതൽ വിവാഹങ്ങൾ നടന്നത്.
264 വിവാഹങ്ങൾ നടന്ന 2016 സെപ്റ്റംബർ നാലായിരുന്നു ഇതുവരെ ഏറ്റവും കൂടുതൽ വിവാഹങ്ങൾ നടന്ന ദിവസം. എന്നാൽ 2017 ആഗസ്റ്റ് 27 ഞായറാഴ്ച 277 വിവാഹങ്ങൾ നടന്നതോടെ 2016 സെപ്റ്റംബർ നാലിലെ റെക്കോർഡ് തകർന്നു.
എന്നാൽ ഞായറാഴ്ച പുലർച്ചെയും വിവാഹ പാർട്ടിക്കാർ ടിക്കറ്റെടുക്കാൻ കൗണ്ടറിലെത്തി. ഇതോടെയാണ് വിവാഹങ്ങളുടെ എണ്ണം 277ലെത്തിയത്.
ഏറ്റവും കൂടുതൽ വിവാഹം നടന്ന ആഗസ്റ്റ് 27 ഞായറാഴ്ച ദിവസം ക്ഷേത്രത്തിന് സമീപത്തെ സദ്യാലയങ്ങളും ഓഡിറ്റോറിയങ്ങളുമെല്ലാം നിറഞ്ഞു കവിഞ്ഞു. ഓഡിറ്റോറിയങ്ങളിലും ലോഡ്ജുകളിലുമെല്ലാം ഒരു മാസം മുൻപ് തന്നെ ബുക്കിംഗ് അവസാനിച്ചിരുന്നു.
ക്ഷേത്രത്തിന് സമീപത്തെ എല്ലാ ഹോട്ടലുകളും ലോഡ്ജുകളും ഫുള്ളായതോടെ വിവാഹങ്ങളിൽ പങ്കെടുക്കാനെത്തിയ പലർക്കും താമസിക്കാനിടം ലഭിച്ചില്ല. മിക്കവരും ക്ഷേത്ര പരിസരത്താണ് കഴിച്ചുകൂട്ടിയത്.
ആഗസ്റ്റ് 27 ഞായറാഴ്ച രാവിലെ പത്ത് മണി മുതൽ ഉച്ചയ്ക്ക് പന്ത്രണ്ട് മണി വരെയുള്ള സമയത്താണ് ഏറ്റവുമധികം വിവാഹ മുഹൂർത്തങ്ങൾ കുറിക്കപ്പെട്ടത്.
Top